Protesta e Madhe/ “Armiqtë e Popullit”, Policia e Edi Ramës: 15 të arrestuar dhe 7 në kërkim
Zelli që tregoi regjimi i Edi Ramës dje pas përfundimit të Protestës së Madhe të opozitës, tejkalon edhe kufijtë e çmendurisë.
Me të perënduar dielli, gjithë forcat e policisë u vunë në shërbim të prangosje së qytetarëve që morën pjesë në protestë, me pretekstin e “shkatërrimit të pronës dhe prishjes së rendit dhe qetësisë publike”
Ndonëse të gjithë ishin në pritje të arrestimit të atyre eprorëve që hartuan planin e masave për sigurimin e mbarëvajtjes së protestave dhe dështuan meqë policët më shumë qëndruan si shikues se sa si roje të rendit publik, Edi Rama veproi ashtu siç veproi me ata që kanabizuan gjithë Shqipërinë.
Madje për nga numri i të arrestuarve, ai konfirmoi akuzat e opozitës se është në shërbim të krimit, sepse për shkatërrimin e një kërpudhe idiote arrestohen 15 persona dhe 7 shpallen në kërkim, ndërsa për kultivimin dhe shitjen e marijuanës në Shqipëri, jo vetëm që nuk arrestuan as ata shefa policie që u akuzuan me dëshmi nga lideri i opozitës, Lulzim Basha, por edhe kur këto akuza vinin nga ministrat e kabinetit të tij, siç ishte rasti me Drejtorin e policisë Durrës të akuzuar nga ministri Lefter Koka. Askush nuk veproi dhe droga vazhdoi të mbillej, korrej dhe shitej në tregun italian.
Njoftimi i Policisë
Pas analizimit të pamjeve filmike, raport shërbimeve dhe provave të tjera të mbledhura, gjatë protestës së djeshme ku pati akte të dukshme dhune, Policia ka arrestuar 15 shtetas për veprat penale “Kundërshtimi i punonjësit të policisë së rendit publik”, “Goditje për shkak të detyrës”, “Shkatërrimi i pronës” dhe “Prishja e qetësisë publike”.
Gjithashtu u proceduan penalisht në gjendje të lirë 5 shtetas, si dhe janë shpallur në kërkim dhe po punohet për kapjen e 7 të tjerëve.
Shërbimet e Policisë Tiranë arrestuan në flagrancë shtetasit:
F.H., 44 vjeç, banues në Tiranë;
E.N., 28 vjeç, banues në Tiranë;
N.H., 51 vjeç, banues në Kavajë;
A.Gj., 54 vjeç, banues në Divjakë;
R.D., 23 vjeç, banues në Tiranë;
S.D., 41 vjeçe, banuese në Tiranë;
D.L., 33 vjeç, banues në Shkodër;
H.J., 76 vjeç, banues në Tiranë;
I.H., 49 vjeç, banues në Durrës;
F.T., 44 vjeç, banues në Tiranë;
S.R., 43 vjeç, banues në Cërrik;
M.F., 55 vjeç, banues në Elbasan;
L.J., 38 vjeç, banues në Tiranë;
P. Sh., 51 vjeç, banues në Shkodër;
V. D., 30 vjeç, banues në Fier.
Këta shtetas gjatë zhvillimit të tubimit në datë 16.02.2019, pas orës 11:00, në Bulevardin “Dëshmorët e Kombit”, kanë çarë kordonin e policisë duke kundërshtuar e goditur punonjësit e policisë, të cilët ishin të planizuar me shërbim për garantimin paqësor të tubimit. Gjithashtu kanë goditur dhe thyer me mjete të forta, dyert, xhamat dhe vepra arti në hyrjen kryesore të Kryeministrisë së Republikës së Shqipërisë.
U proceduan në gjendje të lirë 5 shtetas:
G.D., 25 vjeç, banues në Tiranë;
A.T., 20 vjeç, banues në Tiranë;
R.B., 53 vjeç, banues në Prenjas;
D.Ll., 47 vjeç, banues në Tiranë;
P.Th., 52 vjeç, banues në Shkodër.
Gjithashtu janë shpallur në kërkim dhe po punohet për kapjen e 7 shtetasve të tjerë. Materialet iu dërguan për veprime të mëtejshme Prokurorisë së Rrethit Gjyqësor Tiranë.
