Protesta e naftëtarëve/ Tensionohet situata, nisin shoqërimet…
Naftëtarët e Ballshit janë mbledhur ashtu siç kishin paralajmëruar sot për të protestuar para MIE, por forcat e policisë kanë ndërhyrë për të mos lejuar mbajtjen e protestës, për shkak të pandemisë së COVID-19.
Naftëtarët deklarojnë se protestat dhe manifestimet kanë rënë në vesh të shurdhër dhe se situata tashmë është bërë e padurueshme ndërsa përsëritën se kanë 20 paga të pamarra dhe 11 muaj pa punë, ndërsa gjendja e tyre ekonomike është e vështirë.
”Prej shumë vitesh ne, naftëtarët e Ballshit, jemi vjedhur, tallur e nëpërkëmbur nga pronarët dhe pushtetarët. Kemi thuajse 20 paga pa marrë, edhe pse i kemi fituar me gjyq. Jemi të papunë këta 11 muaj të fundit, pa bukë për fëmijët dhe familjet tona!” theksuan naftëtarët edhe para MIE ndërkohë që policia u kërkonte të shpërndahen për shkak të masave COVID-19 por naftëtarët e Ballshit kërcënuan se nuk largohen nga aty, nëse zyrtarët nuk i japin sqarim, duke thënë se protestuesit i kanë marrë masat edhe për dhunë.
“Të na japin rrogat, që kemi punuar. Të na japin librezat, detyrimet, qelbësirat, hajdutët. Nuk vjen njeri të na sqarojë. Janë të tërë të korruptuar, o nuk bëhet më ky vend. O të hapet dera e ministrisë, o do vdesim këtu. Nuk kthehem më në Ballsh, vetëm e vdekur, se kam punuar, kam lënë gjakun atje. Kemi 3 vjet pa marrë rrogat, se pronari ikën në drejtim të paditur. Ç’është ky pronar, kush e sjell? Nafta është shumë cilësore. Të paktën nga shtatori deri në dhjetor na kanë dhënë një lëmsh, vetëm 230 mijë lekë. Nga janari deri tani talli Edi Rama veten, duke na dhënë një pagë lufte 400 mijë leksh. Tani na gënjejnë, bëmë kontratat nuk erdhi njeri, tani na sjellin policët të na hedhin gaz lotsjellës. Çfarë i ka bërë populli Ramës, Sali Berishës, Ilir Metës, se janë pasuruar me naftën, me gjakun tonë. Jemi të shkolluar të gjithë, nuk na gënjejnë dot. Ne nuk lëvizim që këtu, ta dinë mirë, i kemi marrë masat edhe për dhunë”, u shpreh protestuesja.
“Ju e çoni pagën në fund të muajit në shtëpi, e nëse ju vonohet një ditë, ankoheni, po ne me çfarë do jetojmë? Ku do shkojmë, në çfarë dere të trokasim, ku do e marrim ndihmën? Do votat ai, do mandat të tretë. Buka nuk ka ngjyra, është pa ngjyra, nuk është politikë. Ne duam bukën të ushqejmë fëmijët”, tha një protestuese tjetër.
Vendosmërisë së naftëtarëve për të protestuar deri sa nuk marrin sqarime nga zyrtarët e MIE, forcat e rendit iu përgjigjën me shoqërime.
