Protesta e Opozitës, Berisha: Nesër do jem kudo, në sallë, jashtë salle, te qytetarët…

Protestën para Kryesisë së Parlamentit ndërsa aty zhvillonte mbledhje Këshilli i Mandateve për heqjen e imunitetit të, Kryetari i Partisë Demokratike, Sali Berisha e vlerësoi si një protestë të shkëlqyer ndërsa për protestën e nesërme tha se do jetë kudo, në sallë, jashtë salle, te qytetarët dhe kudo, në betejë pa kthim.

“Protesta e kryesisë së Kuvendit ishte një protestë e shkëlqyer. Ta them unë, se pakkush mund të ketë një arkivë më të pasur se kam unë. Për rrethanat që u thirr, ajo ishte një protestë e shkëlqyer.

Kjo tjetra, ka një gjë, se duhet të kuptohemi. Kompleksiteti rrethanave, vetëm një pjesë e atyre që duan të protestojnë, i lejon të vijnë në protestë dhe ne e kemi shumë të qartë këtë punë.

Për ne e rëndësishme është që nisëm tani protestat për të mos i ndaluar më gjer ditën e fitores mbi narkoregjimin e Edi Ramës. Kjo ka rëndësi.

Ku do jem unë atë ditë? Kudo do jem unë. Pantotenik. Në sallë, jashtë salle, te qytetarët dhe kudo.

Në betejë, betejë pa kthim,” tha Sali Berisha ndërsa paralajmëroi protesta edhe para SPAK, aty ku vulosën, taposën vjedhjen e shekullit, gjersa bëhen hetime të delekiduara për këtë aferë të inceneratorëve.

“Ne nuk mund të pranojmë të shkelmohen në mënyrë flagrante interesat e këtyre njerëzve që po largohen të vjedhur gjer në palcë.”

FJALA E PLOTË:

Amnistia e Erion Veliajt nga Kraja-Prençi, përbën krimin më të shëmtuar në historinë e hetuesisë shqiptare.

Përbën dhunimin më flagrant të të ligjave të vendit dhe uzurpimin e pushtetit të parlamentit, të cilit Kushtetuta i njeh të drejtën e amnistisë.

Duke u marrë me amnistorët, rezulton se këta janë delinkuentë dhe persona që në konflikt flagrant interesi, kanë shpallur amnistinë e Erion Veliajt, Edi Ramës, Agaçit, Artur Metanit dhe të tjerëve.

Arben Kraja, ish-hetuesi xhelat i Sigurimit të Shtetit, që ka dënuar dhe në vitin 1990, një të ri në Shkodër për fajin e vetëm se nuk pranonte moralin komunist. Ky hetues thotë se ai ka shkelur normat e moralit komunist.

Kraja qëndron në prokurorinë e shtetit në kundërshtim flagrant me ligjin aktual për prokurorinë dhe nenin 6 të Kushtetutës së Shqipërisë.

Se cili është integriteti i tij për të qenë rrogëtar, është kjo dëshmi, të cilin ky këtë akt nuk e kryen në vitin 1995, 1996 apo 1970, por e kryen një vit pas rrëzimit të Murit të Berlinit dhe rënies zinxhir të diktaturave komuniste.

Kraja është një person i papërgjegjshëm, që nuk duhej të merrej kurrë me dosjen Veliaj, me dosjen e djegësit të Tiranës, sepse nipi dhe mbesa e tij janë bashkëpunëtorët më të afërt të Erion Veliajt në Bashkinë e Tiranës.

Në çdo lloj mënyre, ata i kanë pasur dyert e hapura të ndikojnë te Kraja, por rezultati dëshmon vetë, është amnistia e paimagjinueshme i njeriut që ka firmosur të vidhen në qytetin e Tiranës rreth 1 miliard euro në 30 vite nga ai vetë dhe Edi Rama.

Prokurori tjetër Prençi, një mik i njohur i McGonigalit, nuk mund të hetonte kurrë po të kishte minimumin e minimumit të ndërgjegjes së zyrtarit, mbasi lidhjet e tij me Zoton, të strukturuara, nuk lejonin hetimin e aferës së shekullit nga Prençi.

Pra, janë këta dy persona, të cilët kanë injoruar dhe fshehur çdo dokument të shtetit, për të amnistuar Erion Veliajn.

Ne jemi këtu sot se si këta prokurorë politikë kanë shumëzuar me zero kontrollin e institucionit kushtetues për kontrollin e buxhetit, Kontrollin e Lartë të Shtetit, lidhur me këtë vjedhje të shekullit.

Zoti Këlliçi do ju njohë ju me konkluzionet e këtij raporti, në të cilin del e qartë si drita…

Ju e dëgjuat ekspozenë tronditëse që zoti Këlliçi bëri duke paraqitur para jush raportin e institucionit kushtetues, me detyrë kushtetuese kontrollin e përdorimit të shpenzimeve të buxhetit.

Në të gjithë dokumentet që kemi paraqitur, Erion Veliaj jo vetëm është me firmat e tij përgjegjësi numër 1 i vjedhjes dhe zhdukjes së 130 milionë eurove, por është gjithashtu korruptori më kryesor, me Edi Ramën, i institucionit të akuzës.

Zoti Këlliçi tha se Kraja dhe Prençi kanë pasur frikë.

Jo, nuk kanë pasur frikë zoti Këlliçi, ata janë bashkëautorë në këtë krim të shëmtuar.

Nuk kanë pasur frikë, ata kanë një ndërgjegje krimi sepse ose ata kanë marrë restin 1 ose 2 milionë euro për të bërë këtë krim të shëmtuar, për të hequr emrin e Erion Veliajt nga 110 faqe akuzë, ose ata si pjesë e organizatës kriminale me Edi Ramën, zbatojnë urdhrat e verbra të tij.

Këto janë të njohura, ne kemi faktuar çdo gjë gjë këtu.

Ne kemi faktuar çdo hallkë që fakton përgjegjësinë absolutë dhe vjedhjen e 130 milionë eurove personalisht nga Erion Veliaj, Edi Rama dhe enturazhi i tyre.

Cilido të jetë çmimi, ne do sjellim para jush çdo dokument të çdo vjedhje nga cilido që e bën atë.

Por, këto nuk mjaftojnë.

Duhet zgjidhja! Dhe zgjidhja nga vrasësit e ligjit dhe të drejtës në institucionin e akuzës nuk vjen kurrë.

Zgjidhja vjen nga protesta juaj, të dashur qytetarë, para këtij institucioni që funksionon në mënyrë absolute njëlloj si dikur hetuesit e sigurimit të shtetit.

Që ka në gjirin e vet, ish-xhelatë të diktaturës që dënonin në vitet ’90 të rinj pse shkelnin normat e moralit komunist, që shuajnë çdo ligj për të mbrojtur ata që u plaçkisin ju në mënyrë të tmerrshme.

Erion Veliaj veproi ndaj djegësit të Tiranës, njëlloj si njeriu që mbyll sytë dhe nuk sheh asgjë, duke besuar se zhdukja e parave tuaj do mbetej pa u zbuluar.

Ne e bëmë punën tonë. Ne zbuluam, ne paraqitëm çdo dokument dhe fakt dhe ai nuk

kundërshton dot asgjë.

U përket ju dhe vetëm juve të thoni fjalën tuaj.

Këta nuk janë prokurorë, këta janë persekutorët tuaj, janë grabitës dhe plaçkitës të djersës dhe mundit tuaj.

Nuk mund të tallen këta me ju.

Mos harroni se një qytetar vari veten për 35 dollarë që i kishte borxh shtetit shqiptar në burgun e Lushnjes. Nuk kishte paguar tarifën e elektrikut. 22 mijë qytetarë u burgosën për tarifat e elektrikut.

Kurse këtu 130 milionë euro u zhdukën sepse Erion Veliaj i kaloi të gjitha në kontot e veta dhe të Edi Rramës, sepse ishte përgjegjësi numër 1 për mbikëqyrjen e ndërtimit të objekteve.

Edi Rama mbyll këto afera, ndërkohë mban në arrest shtëpie si armik të popullit, njeriun që në përputhje me të gjitha ligjet e vendit ka marrë 410 metër tokë të trashëguar nga familjarët e tij.

Kurse vetë Rama, nga kjo tokë, ka plaçkitur, ka grabitur, ka vjedhur me katër vendime qeverie të personalizuara njëra pas tjetrës, në shkelje flagrante të ligjit, 1500 metra tokë të kësaj familje, plus 2500 të familjeve të tjera, të lëna aty për vakëf, të lëna për shkollë në nderim të komunitetit, por edhe në një përshpirtje të paraardhësve të tyre.

Ndaj dhe është koha të zgjohemi, instrumentet dhe veglat e Edi Ramës nuk mund të tallen më me ju, me ligjin, me të drejtën, me pasuritë tuaja.

Ata të cilët u servirin ju Skapin si institucion që ka kompetenca amnistinë, ata janë për instalimin këtu të një regjimi pa opozitë, të një regjimi mafioz, të një regjimi që kërkon të zhbëjë çdo ditë Shqipërinë.

Isa Myzyraj, Ora News: Që në nisje të konferencës suaj ditën e sotme ju akuzuat prokurorin e SPAK, Arben Kraja që ka qenë hetues në komunizëm. Ju keni shmangur në vazhdimësi një vendim të autoritetit të dosjeve të datës 3 prill 2019, ku z.Kraja pas hetimeve dilte që ka një figurë të pastër për sa i përket të shkuarës së tij në kohën e komunizmit. Dhe ajo me procesverbal sipas autoritetit të dosjeve është vetëm z.Kraja ka bërë vetëm dy hetime, por që veprat penale nuk i ka klasifikuar siç i kërkonte ligji, por në fakt i ka lehtësuar. A po e sulmoni ju z.Kraja vetëm që është prokurori juaj?

Sali Berisha: Gabim shumë. Ai dokument fakton se Arben Kraja ka dënuar për një vepër penale ideologjike dhe ka vepruar mbi bazën e doktrinës së sigurimit të shtetit dhe e ka bërë këtë akt në vitin 1990, në korrik, ka mundësi që neni i agjitacionit dhe propagandës ka qenë i abroguar nga Ramiz Alia. Këtu ka tendenca të rehabilitojnë Enver Hoxhën, por askush nuk mund të mohojë dokumentin.Dhe dokumenti do të ishte krejt tjetër qëndrimi, nëse ai do thoshte se ky njeri është i pafajshëm, por e ka mbajtur fajtor dhe thotë se e lehtësova, nuk ka turp më të madh. Pra, është një falsifikim. Ky dëshmon edhe njëherë se si funksionon ai autoritet, se çfarë përfaqëson ai autoritet aty. Së dyti, Kraja është sulmuar nga unë sepse në kundërshtim me ligjin, ai qëndron në detyrë, pikërisht se i kanë ekzoneruar aktet. Ai jo vetëm ka qenë një oficer i sigurimit, ka mbaruar shkollën e sigurimit, dhe e dini se si e ka mbaruar? E ka mbaruar si vullnetar natën.  Po! Ai në biografinë e tij tregon se ka mbaruar fakultet tjetër, po aq pasion ka pasur për sigurimin dhe hetuesinë dhe është futur dhe e ka mbaruar natën. Nuk e dija që sigurimi ka pasur shkollë natën, por ata e kanë pasur pa shkollë, e kanë pasur rrjetin e punonjësve, merrnin nga shkolla, por merrnin edhe të tjerë, dhe këta që i merrnin, i shkollonin. Ky ka pasur shkollë, ky ka shkuar nga pasioni i tij, ka pasur pasion spiunimin për sigurimin dhe është futur në shkollë. Mjafton fakti që ka mbaruar shkollën e sigurimit. Turp! Ligji i lustracionit, Kushtetuta dhe ligji i prokurorisë së përgjithshme, këtë e nxjerrin jashtë shërbimit. Natyrisht këtu ligjet nuk pyeten, ligjet janë Edi Rama dhe ky është një shërbëtor, një mercenar i Edi Ramës që e mban në detyrë. Edhe pardje thoshte që nuk kam qenë në politikë. Ka qenë kandidat për deputet i Partisë së Punës së Shqipërisë. Po këta janë një soj, një racë mashtruesish që kanë bërë atë shkollë, ata shkollën e bënin vetëm për këtë punë.

Anisa Kadesha, RTSH: Z. Berisha, a keni fakte që provojnë miqësinë e Prençit me McGonigal? Ju thatë që kanë patur miqësi të dy.

Sali Berisha: Bën mirë që Dritan Prençi t’i tregojë vetë lidhjet, cilat kanë qenë lidhjet e tij me McGonigalit dhe a ka marrë pjesë në sistemin e gjobave që McGonigal ka vendosur në Shqipëri me Edi Ramën. Pyetja ime: A ka marrë pjesë në sistemin e gjobave që ai ka vendosur ndaj biznesmenëve si grup i strukturuar kriminal me Edi Ramën, Agron Nezën dhe Dorian Duçkën në Tiranë.

Ermal Rizaj, SYRI TV: Z.Berisha, ju deklaruat se cilido që të jetë çmimi do të sillni prova dhe fakte për sa i takon çështjes së inceneratorëve. Çfarë do të thotë kjo deklaratë? Keni marrë ju kosto duke bërë denoncime të forta sa i takon kësaj çështje, ose përfaqësues të tjerë sa i takon PD?

Sali Berisha: Ne kemi marrë koston më pozitive nga qytetarët, sepse qytetarët e panë pas kaq vitesh se kanë opozitë të vërtetë. Ata që menduan të lënë Shqipërinë pa opozitë, dështuan dhe kjo është fitore e madhe për çdo shqiptar që i beson vlerave. Kostoja tjetër është e njohur publikisht. Por kjo nuk do na ndalojë ne për të denoncuar në çdo qelizë vjedhjen, trafiqet e drogës, lidhjet me krimin të Edi Ramës dhe bajlozëve, anëtarëve të tjerë të organizatës kriminale që ai drejton. Unë e kuptoj që kanë njëlloj mbrojtje, por kjo nuk e pengon opozitën për të mbushur detyrën e tyre. Ju i patë reagimet që u bënë për zgjedhjet në Serbi dhe jam i bindur se Aleksandër Vuçiç nuk ka bërë zgjedhje të lira, ka plaçkitur vota, nuk kam dyshim se është vëlla siamez me Edi Ramën. Por nga ana tjetër ju garantoj se në Shqipëri kanë qenë edhe më të këqija zgjedhjet. Ndaj dhe ne po luftojmë, po bëjmë betejën tonë. E rëndësishme është se shqiptarët e shohin çdo ditë që kanë një opozitë në këmbë që qëndron për interesat e tyre.

Mariglen Kume, MCNTV: Ju keni thirrur një protestë ditën e nesërme para parlamentit. Do të qëndroni me qytetarët në protestë, apo do të tentoni të hyni në parlament, dhe prisni më shumë masivitet se protesta te Kryesia e Kuvendit.

Sali Berisha: Protesta e kryesisë së Kuvendit ishte një protestë e shkëlqyer. Ta them unë, se pakkush mund të ketë një arkivë më të pasur se kam unë. Për rrethanat që u thirr, ajo ishte një protestë e shkëlqyer. Kjo tjetra, ka një gjë, se duhet të kuptohemi. Kompleksiteti  rrethanave, vetëm një pjesë e atyre që duan të protestojnë, i lejon të vijnë në protestë dhe ne e kemi shumë të qartë këtë punë. Për ne e rëndësishme është që nisëm tani protestat për të mos i ndaluar më gjer ditën e fitores mbi narkoregjimin e Edi Ramës. Kjo ka rëndësi. Ku do jem unë atë ditë? Kudo do jem unë. Pantotenik. Në sallë, jashtë salle, te qytetarët dhe kudo. Në betejë, betejë pa kthim…

-Në seancën e ditës së enjte në pikën e parë është vendosur votimi për heqjen e mandatit tuaj si deputet, ndërkohë që pritet një vendim nga Gjykata e Posaccme ndaj jush, për masën e sigurisë. Nga ku do ta drejtoni aksionin opozitar z. Berisha.

Sali Berisha: Ju e patë, për herë të parë në histori, kërkesa për heqjen e imunitetit u shoqërua me zero prova, fakte dhe dokumente. Ju garantoj se kjo as në vendet diktatoriale nuk ndodh. Paraqesin diçka. Po pse nuk paraqitën dot asgjë? Sepse nuk kanë asgjë. Sepse kanë vetëm trillime, shpifje dhe manipulime. Nga hetimi 3-vjeçar i një procesi 15-vjeçar, vepra e vetme penale është kryer nga Edi Rama, ndër korrupsion ose faktorë të tjerë. Asnjë tjetër. Nëse quhet vepër penale ndryshimi i destinacionit. E ka ndryshuar destinacionin fillimisht të një pjese, më pas të të gjithë pjesës. Nga terren sportiv në terren urban me zhvillim të lartë, jo të mesëm, të lartë. Kështu që në këtë kontekst, ai është procesi më ligjor, ndaj dhe nuk nxorën dot asnjë fakt. Dhe kur avokati im pyeti ish-oficerin e sigurimit, na jep një dokument në lidhje me ndryshimin e destinacionit, ai nuk nxori dot asnjë, sepse kudo që të fuste dorën, i dilte Edi Rama. Nuk kanë asnjë fakt, asnjë provë, asnjë dokument. Pra, është strikt politik. A do drejtoj unë? Nesër Shqipëria, ose me këtë, renditet me vendet që arrestojnë liderin e opozitës. Nuk kanë hequr dorë ata nga drejtimi i opozitës, përkundrazi po e drejtojnë dhe fuqishëm. Të gjithë ata aty ku janë. Dhe unë do e drejtoj me vendosmëri drejt fitores këtë opozitë. Unë kam besim të plotë se ky narkoregjim, kjo diktaturë e bazuar në vjedhjen, krimin, drogën dhe interesat mafioze, nuk do mund të prevalojë kurrë.

-Prokurorët, pra masa e dytë ndaj jush, sipas prokurorëve, vjen jo për shkak të hetimit të ccështjes në themel të dosjes ‘Partizani’, por për shkak se ju nuk keni respektuar masën e parë të sigurisë ‘detyrim paraqitje’ dhe si prova paraqitën procesverbalet e oficerëve që ju nuk jeni paraqitur.

Sali Berisha: Tipike e shtetit policesk. Tipike! Nëse kërkon heqjen e imunitetit të një deputeti, ligji i parlamentit thotë se ajo bëhet bazuar në prova, fakte, dokumente. Nuk ka asnjë nen që pranon se parlamenti mund të vihet para faktit të kryer, që të legjitimojë vendime antikushtetuese. Unë besoj se për çdo shqiptar është bërë e qartë se standardi që përdoret ndaj Sali Berishës nuk është përdorur kurrë në 32 vite. Janë vendimet e gjykatave në rastet e mëparshme kur është kërkuar kjo gjë dhe gjykatësit kanë refuzuar, kanë shkruar në vendimet e tyre se kjo nuk mund të bëhet pa miratimin e parlamentit. Gjetën një gjykatëse të shkarkuar nga unë për vepra të caktuar në vitin 1996 dhe me një kompleks problemesh, qoftë në veting, qoftë të tjera, e cila faktikisht rishkruajti në tavolinën e saj, së bashku me Millonain dhe Krajën, nenin 73 të Kushtetutës. Unë e them që veprova shumë drejt, nuk iu nënshtrova shkelmimit të parimit të Kushtetutës, rrëmbimit të pushtetit të parlamentit nga mercenarë që zbatojnë urdhra politikë. Po të kishte një fakt, një argument, një dokument, ata ishin të detyruar t’i paraqisnin para shqiptarëve. Por ata nuk kanë asgjë sepse në të gjithë atë proces nuk ka asnjë firmë të Sali Berishës, nuk ka asnjë vendim të personalizuar, përveç noterizimit të vendimit të Edi Ramës, të cilin unë isha i detyruar ta bëja në zbatim të ligjeve. Përndryshe shpërdoroja detyrën po ta bëja. Po unë nuk jam nga ata që shpërdoroj detyrën.

Anesti Bajramemaj, A2CNN: Z. Berisha, në fjalën tuaj deklaruat se duke akuzuar prokurorët e SPAK dhe duke i akuzuar se nuk po bëjnë drejtësi, do të thirrni qytetarët për të reaguar për këtë çështje. Do të thërrisni një protestë para SPAK?

Sali Berisha: Vetëm qytetarët mund ta zgjidhin këtë. Gjersa vulosën, taposën vjedhjen e shekullit, gjersa bëhen hetime të delekiduara në këtë aferë, merre pak si e shpërndanë me persona, e kapën Arben Ahmetajn sepse zonja Linda e donte në burg Ahmetajn. Çfarë kishte Ahmetaj për t’u shkëputur? Strumbullari ishte Rama, Agaçi, Metani sepse ata janë njerëzit e hartimit, e paraqitjes së vendimeve. Ishte strumbullar Erion Veliaj, kurse sa ç’ishte Ahmetaj, është Gjiknuri dhe mund të ketë të tjerë se dosja ka akoma anë të pashqyrtuara, po i mbledhim.

-Kur do të jetë kjo protestë, do ta thërrisni ju apo qytetarët…

Sali Berisha: Protestën mund ta thërrasim edhe ne. Ne nuk mund të pranojmë të shkelmohen në mënyrë flagrante interesat e këtyre njerëzve që po largohen të vjedhur gjer në palcë. Ne nuk mund ta pranojmë këtë gjë, jo absolutisht. Për dijeni, protestohet në gjithë botën para padrejtësive të organeve të drejtësisë. Siç gjykohet. Por kësaj here ne kemi fakte. Thirren të protestojnë në mbrojtje absolute të një interesi publik. Erion Veliaj ka përdorur të gjitha lidhjet e tij, brenda dhe jashtë vendit, për të imponuar amnistinë. Ne do përdorim të gjithë forcën e qytetarëve për të bërë ligjin. Qytetarët do flasin. Nuk mundet 2, 3, 5, 10 apo më shumë individë të tallen, të vulosin, të taposin vjedhje të tilla të tmerrshme sepse vjedhin me ta. Gjëja më normale është protesta, bile është e vonuar. Ne ndjehemi të lirë fare, sepse ne po denoncojmë me dokumente zyrtare. Tani është koha të veprojmë!

Anisa Kadesha, RTSH: Z. Berisha a u konsultuar me avokatët në lidhje me qëndrimin që do të mbani për vendimin e pritshëm nesër të seancës plenare.

Sali Berisha: Probleme puna  nuk më kanë lejuar akoma, por pa diskutim që ajo konsultë do të bëhet.

Kristi Kongo, TCH: Ju keni ndryshuar sloganin e PD-së për protestën në ‘O Sot o Kurrë’. A mos planifikoni që ditën e enjte përveç protestës para parlamentit ta zhvendosni atë të SPAK.

Sali Berisha: Slogani i protestës është sepse ne jemi pas opozitës ruse, bjelloruse, Mianmarit dhe Iranit, opozita e pestë në botë e arrestuar. Kjo është një përpjekje e hapur për shkatërrimin e opozitës. Po ju garantoj se siç dështoi çdo përpjekje tjetër, do dështojë edhe kjo. Pse e them këtë? Sepse sot, lavdi Zotit, ka opozitë. Dhe pikërisht se ka opozitë, u morën këto masa. Mirëpo beteja me idealet është shumë e vështirë. Nuk fitohet. Edhe këtë betejë do e fitojmë ne. Cili është itinerari i protestës, atë nuk e di se nuk jam unë që merrem me itinerarin e protestës. Janë persona të tjerë që do të merren dhe ju do të jeni aty.

Erneta Shevroja, ABCNews: Z. Berisha qëndroj ende te protesta te SPAK. Kur e planifikoni për ta zhvilluar protestën para SPAK, vijon që të këmbëngul te kjo pyetje?

Sali Berisha: Ne ecim me një program diskret, por në kohën e duhur do e merrni vesh. Do ndodhë, ju garantoj se ka kaluar çdo masë. Në qoftë se xhelatë të ligjit dhe të drejtës mendojnë se mund të taposin afera të certifikuara 130 milionë euro, apo ai tjetri që e çojnë për hetim se nuk ka zbuluar konfliktin e interesit mes dy zyrtarëve që nuk ka asnjë detyrim për të zbuluar ai, nuk mund të tallen me një popull ata. Ata veprojnë në këtë mënyrë për shkak të lidhjeve të tmerrshme që kanë me krimin dhe ne do ngrihemi. Ata kanë një besim, pushteti gjyqësor në botën e qytetëruar nuk vjen nga zgjedhjet në tërësi, vjen nga besimi që i japin pushtetet e tjera se do zbatojnë ligjin. Dhe ky besim përbën detyrim madhor për respektimin e tyre. Por kur ata shkelmojnë këtë besim dhe e përdorin për qëllime politike, të pasurimit të tyre, ata meritojnë të trajtohen si armiq të ligjit dhe të drejtës. Nuk mund të ndodhë kjo. Çon strajcat Erion Veliaj te këta dhe ata e amnistojnë. Ne prandaj i sqarojmë qytetarët dhe qytetarët janë të revoltuar shumë. Ka një revoltë shumë të madhe të qytetarëve.

Isa Myzyraj, OraNews: Z. Berisha a ekziston mundësia që ju të zbatoni vendimin e gjykatës, pas konsultimit me avokatët, ‘arrestin në shtëpi’ ta kryeni në ambientet e PD, pra në zyrën tuaj, e keni shqyrtuar me veten sepse me avokatët u kuptuar që ende se keni …

Sali Berisha: Konsultë me avoketërit. Futet në folderin, konsultë me avokatët …

Faleminderit: