Protesta e opozitës në Moskë, 1.373 të arrestuar

Policia në Moskë ka arrestuar mbi 1.300 persona në ditën kur po Para, gjatë dhe pas protestës së opozitës në Moskë kundër parregullsive në zgjedhje janë arrestuar 1.373 persona, tha organizata e pavarur OVD-Info duke dhënë kështu numrin e saktë dhe duke përgënjeshtruar policinë e cila përmes një njoftimi zyrtar tha se ka arrestuar 1.074 persona gjatë protestës.

Policia përdori shkopinj kundër protestuesve të cilët ishin mbledhur dje pranë Bashkisë së Moskës por arrestimi i protestuesve vazhdoi edhe pasi ata u zhvendosën në lokacione të tjera të Moskës.

Në mesin e të arrestuarve janë edhe disa figura opozitare, përfshirë Ivan Zhdanov, Ilya Yashin dhe Dmitry Gudkov.

Amnesty International tha se ka parë përdorim të forcës nga policia, që rrahu me shkopinj dhe përplasi për toke protestuesit.

Aleksandra Parashina, anëtare e Këshillit bashkiak të Moskës, që vjen nga opozita, tha për RFE se ajo ishte goditur në kokë nga policia dhe se ndërhyrja e forcave ruse ishte brutale ndaj masës e cila ishte mbledhur në afërsi të zyrës së kryetarit të bashkisë.

Ndërkaq, drejtorja e Amnesty International në Rusi tha se autoritetet kanë rënë në nivelin më të ulët, sa i përket përdorimit të masave të sigurisë që i përngjajnë ligjeve ushtarake, duke bllokuar rrugën kryesore të Moskës dhe duke mbyllur lokalet që gjenden në atë zonë.

Ndryshe, pas vendimit të autoriteteve të Putinit për të ndaluar kandidatët opozitarë për të marrë pjesë në zgjedhje, pavarësisht se ata kishin mbledhur nënshkrimet e nevojshme për një gjë të tillë, protesta u thirrë nga lideri opozitar, Aleksei Navalny. Ai është arrestuar më 24 korrik dhe është dënuar me 30 ditë burgim për thirrje të protestave.