Protesta e Opozitës/ Parlament ilegjitim, Basha: Të zgjedhet nga shqiptarët, jo nga krimi!

Pas mbledhjes së zhvilluar me Aleatët, kryetari i Partisë Demokratike, Lulzim Basha, duke ftuar qytetarët në protestën që zhvillohet nesër para Parlamentit të Shqipërisë duke filluar në orën 10:00, i bëri të qartë sërish Edi Ramës se nuk do ta njehë asnjë vendim të këtij Parlamenti të krimit dhe politikanët e përfshirë me kokat e krimit të organizuar do të shkojnë para drejtësisë.

“Janë ditë dhe orë intensivë për opozitën. Dita ka nisur me takimin me partnerët tanë ndërkombëtarë. 16 shkurti është një rrugëtim shpresë dhe do mundë frikën dhe propagandën e Ramës. Sot makineria e Ramës është shkërmoqur,” tha lideri i Opozitës ndërsa masat ushtarako-policore të Edi Ramës i vlerësoi si mohim të së drejtës qytetare për të protestuar.

“Ne do të vazhdojmë aksionin kundër këtij parlamenti ilegjitim, që është kapur në flagrancë duke bashkëpunuar me krimin e organizuar. Rama, dosja 339 është makthi yt, ti e di fare mirë se përtej minutave që janë botuar, uroj ta dish se ca përmban edhe dosja 184. Këto do zbardhen, politikanët e përfshirë me kokat e krimit të organizuar do të shkojnë para drejtësisë. Me zgjedhje të lira dh etë ndershme do të kemi një Kuvend të zgjedhur nga shqiptarët dhe jo nga krimi.”

Procesin e zëvendësimit të deputetëve që dogjën mandatet, me të cilin Edi Rama ka projektuar krijimin e opozite në shërbim të mazhorancës, Lulzim Basha e konsideron si klonim të dështuar dhe vendimet e këtij Parlamenti, sipas tij nuk kanë asnjë efekt. “Klonimet e dështuara, Edi Rama do të përpiqet t’i shesë nesër si fasadë opozitë. Shqiptarët janë të vendosur të marrin atqë që ua kanë vjedhur. Çdo hap i Kuvendit ilegjitim nuk njihet nga ne. Çdo vendim i këtij Kuvendi që përfaqëson interesat e një grushti hajdutësh nuk njihet nga ne. Këto janë vendime që nuk kanë asnjë efekt në rrugën që kemi nisur.”