Protesta e Opozitës/ Përmbyllje me zotimin, Basha: Më 16 mars…
Opozita e Bashkuar përmbylli sot protestën para Parlamentit të Shqipërisë duke u zotuar që në protestën vendimtare më 16 Mars do të përcjellin kufomën politikë të Edi Ramës.
Ndonëse Sandër Lleshaj ishte mobilizuar që në emër të sigurisë së deputetëve të shkelë gjithçka që kishte përpara, demokratët e zhgënjyen duke mos i dhënë rast të përdor si dhunën ashtu edhe gazinlotsjellës serbë, me të cilin kontaminuan ditë më parë, gjysmën e qytetit të Tiranës.
Kjo u pa edhe me përmbylljen e protestës në mënyrë paqësore, ku si Ish-Gjeneral Lleshaj ashtu edhe Lali Eri nuk e panë të udhës të reflektojnë siç bëjnë çdo herë me të përfunduar protesta e opozitës, ku njëri numëron pusetat e tjetri gomat e djegura.
Por sot u pa qartë se kur krimi është në Parlament jashtë tij është qetësi dhe gjithçka është në rregull.
Protestë pa leje dhe…
Mazhoranca e Edi Ramës nuk i dha leje Opozitës së Bashkuar për protestë para Parlamentit dhe blindoi Kullën e Ligjeve shqiptare me mijëra policë, por kjo nuk sprapsi qytetarët për të kërkuar rrëzimin e e diktaturës.
Ndonëse Edi Rama ka krijuar idenë se ka mazhorancën parlamentare, ajo ishte para Parlamentit të Shqipërisë duke protestuar. Pra, deputetët e Opozitës që dorëzuan mandatet dhe ata që ishin në listën e pritjes dhe refuzuan mandatin, me përjashtim të disa personave të kapur nga krimi dhe dosjet e shpluhrosura.
Por kjo nuk pengoi shpikësin e rilindjes, Edi Rama, që të mbajë fjalim para deputetëve të tijë komunistë dhe pesë të tjerëve që ishin me shërbim në LSI, për të vazhduar, siç tha, rrugën drejtë Italisë.
“Rama ik” kumboi dhe vazhdonte të kumbonte fillimisht nga banorët e Unazës së Re të prekur nga projekti i Unazës së Madhe dhe qytetarët nga e gjithë Shqipëria që iu përgjigjën thirrje së liderëve opozitar.
Kërkesa ishte po ajo e tri protestave të mëparashme: zgjedhje të parakohshme me një qeveri tranzitore.
Protesta vazhdoi me fjalën e kandidatëve që kanë refuzuar të marrin mandatin në listat e PD, duke theksura se ky Parlament është i votave të vjedhura dhe jo i shqiptarëve, dhe për këtë arsye e kanë refuzuar.
Gerti Bogdani, njëri nga 103 kandidatët nga lista e Partisë Demokratike që refuzuan publikisht marrjen e mandatit të deputetit në protestën përballë Parlamentit, tha se Edi Rama mblodhi qelbësirat dhe fitoi pushtetin.
“Edi Rama ka frikë nga zgjedhjet e lira, sepse në zgjedhje të lira dhe të ndershme nuk ka kriminelë dhe banditë”.
Mirela Tabaku tha se Shqipëria renditet e para për nga vdekshmëria foshnjore, largimin e mjekëve, e fundit ndaj kujdesit shëndetësor. “Unë nuk mund të jem kurrë pjesë e këtij Parlamenti. Rama ik!”
Bernadeta Syku nga Shkodra nuk pranoi të marrë mandatin e deputetes. Në protestë ajo theksoi se si familje e persekutuar nga regjimi komunist, kërkon një Parlament të pastër nga krimi.
“Një porosi për z.Lleshi. Burrat malësorë nuk e kanë pasur zakon me i shërby horrave të komunizmit. Asnjë hap pas. Duam Shqipërinë si gjith Europa.”
Matilda Qurku nga qarku i Sarandës refuzoi kategorikisht të bëhet pjesë e një parlamenti të kriminalizuar.
“Ai mandat nuk më përfaqëson as mua as qytetarët e jugut”.
Martin Biba kandidat i listës së PD për qarkun e Lezhës nuk pranoi thirrjen e KQZ për marrjen e mandatit.
“Ky është mandat i turpit, të cilën e pranuan disa të tjerë. Ky përbindësh nuk bëri asgjë për sportin dhe aviacionin. Aviacionin e ktheu në fushë droge”.
Të çohemi çdo ditë deri sa t’i japin fund regjimit. Nuk po kemi mundësi të ndërtojmë ekonominë, të mbrojmë lirinë për shkak të një grupi njerëzit që kanë vënë interesat e tyre si kular mbi qafën e shqiptarëve, tha kryetari i PR, Fatmir Mediu duke shtuar:
“Kjo qeveri ka ndërtuar një mur të fëlliqur mes saj dhe shqiptarëve, nga njëra anë janë interesat e mafies së organizuar në shtet dhe nga ana tjetër interesat e fëmijëve tuaja dhe kombit, kjo qeveria jo vetëm ka shitur interesat tuaja por edhe ato kombëtare, ndaj duhet reagim i thellë jo vetëm si politikanë por nga cdo skaj i vendit ne duhet të çohemi dhe të themi që jemi njerëz të lirë të një vendi që e ka bekuar zoti dhe nuk duhet të lejojmë ta mbajnë peng.”
Ndërkohë deputeti i PD, Klevis Balliu, theksoi se ky parlament i horrave, bandave, nuk është i qytetarëve shqiptarë, këtu është parlamenti, këtu është fuqia e Shqipërisë.
“Edi Rama hapi veshët sepse është ndez flaka e shpresës, nëse nuk të zgjon do digjesh nga flaka e shpresës. Beteja jonë ka filluar dhe është betejë pa kthim, fuqia e vërtetë është te ju, fuqia juaj është më e madhe se fuqia e njerëzve në pushtet.”
Vetëm pak muaj më parë, tha Ervin Salianji, Shqipëria i dha leksion mbarë Evropës, qeverisë dhe qeverive autoritare mes protestës studentore, mijëra prej tyre i shoh edhe në shesh, a duhet të largohet Rama për ju apo jo? Rama ik!
“Studentët thoshin se e duam Shqipërinë si gjithë Evropa, ne që jemi këtu, të gjithë e duam Shqipërinë si gjithë Evropa.
Secili prej jush e dinë se kur shkon në spitale përballesh me braktisje, mungesë profesionalizëm dhe ilaçe, kurse miliona euro shkojnë për klientët e Ramës, a duhet të largohet që të kemi një shëndetësi për të gjithë
Sa prej jush janë mashtruar në 2013 dhe 2017 duke iu thënë që ne qeveria e Ramës do ti bëjë legalizime falas, sa prej jush i kanë bërë dhe sa ka si protestuesit e Unazës së Re, a duhet të largohet Rama?
Ne po kërkojmë të ketë zgjedhje të lira e të ndershme, që vullneti i qytetarëve të jetë ai që përcakton qeverisjen në këtë vend.”
Deputetëve tradhëtarë, Basha: Zoti pastë mëshirë për shpirtërat tuaj!
Duke marrë fjalën, kryetari i Partisë Demokratike, Lulzim Basha, ka akuzuar ata kandidatë për deputetë që pranuan të marrin mandatin, duke i konsideruar si turpi i familjeve të tyre që kanë shitur shpirtin, ai kishte dhe një lutje për ta:
“Ata të mjerë, ata pak të mjerë që futen në atë godinë, shesin shpirtin, ata janë turpi i familjeve të tyre. Ata do ti gjykojë historia, Zoti pastë mëshirë për shpirtin e tyre sepse fytyrë ata nuk kanë më. Për muaj e vite, zëri juaj ka kërkuar herë me ndrojtje e herë me mllef, kur do ti digjni mandatet. Zëri juaj tashmë është dëgjuar. Opozita i është bindur sovranit. Unë kam sot nderin dhe privilegjin që në emrin e popullit të shpreh mirënjohjen dhe të falënderoj nga zemra ata zonja, zotërinj e zonjusha, ata qindra kandidatë që djegin sot mandatet e tyre,” tha Lulzim Basha duek shtuar se verdikti i populli sovran “Rama ik!” buçet prej 4 javësh, populli e ka marrë vendimin duke e cilësuar Parlamentin e Shqipërisë, karantinë e kolerës së krimit të korrupsionit:
“Është ora të cilën shqiptarët e kanë ëndërruar. Ora e bekuar e shpresës, ora e bekuar e besimit tek vetja jonë, tek familjet tona, tek vlerat më të mira të shqiptarit ora e besimit në të madhin Zot se Shqipërinë.
Thundra e krimit e babëzisë, e hajnisë, thundra e korrupsioni, e perversitetit, e mashtrimit me fytyrën dhe gojën e Edi Ramës shkeli mbi dinjitetin e çdo shqiptari, gegë e toskë, myslimanë e të krishterë. Ora e tij ka mbaruar. Nga ky shesh buçet tash 4 javë verdikti i popullit sovran Rama ik! Sovrani e ka marrë vendimin dhe minjtë e krimit dhe korrupsionit e kanë kuptuar fare mirë, prej javësh ajo godinë nuk është më godina e Kuvendit të Shqipërisë, por karantina e kolerës së krimit dhe korrupsionit,” tha kryetari i PD, Lulzim Basha.
Më pas, lideri i Opozitës ftoi kandidatët për deputetë që së bashku të nisen drejt KQZ-së për të dorëzuar refuzimin e mandatit, ku atyre iu bashkuan edhe pjesëmarrësit e protestës.
Në krye të Opozitës vazhduan të qëndrojnë Basha dhe Kryemadhi derisa u dëgjonin thirrje në kor “Basha, Basha” dhe “Rama ik”. Lulzim Basha me Aleatët u futën në KQZ ndërsa protestuesit vijuan të qëndrojnë në ambientet e jashtme, ku ishte vendosur një kordon i policisë.
Pasi kanë dorëzuar në KQZ formularët e 103 kandidatëve nga listat e PD që refuzojnë marrjen e mandatit të deputetit, Basha dhe Aleatët kanë vijuar të qëndrojnë në krye të Opozitës duke ju drejtuar selisë së Partisë Demokratike ku dhe u bë përmbyllja zyrtare e protestës së sot me fjalimin e kryetarit të PD, Lulzim Basha.
“Sado të përpiqet ta zgjasë agoninë, aq më shumë do ti shtohet makthi dhe fatura para popullit që do ta paguajë para drejtësisë, ndaj dua tu bëj një thirrje shqiptarëve të marrin pjesë në një tjetër akt vendimtar të hapjes së portave të Evropës të zgjedhjeve të parakohshme të lira e të ndershme pa Ramën dhe horrat e kriminelët e tij, Në një akt që do të na bashkojë trefish më shumë se me 16 shkurt. Më 16 mars në protestën vendimtare për ta përcjellë kufomën politike të sektit kriminal të Rilindjes për të çliruar vendit dhe për të shpëtuar të ardhme tonë, zgjedhjet, ekonominë edhe PS”, tha ndër të tjera Lulzim Basha shoqëruar me thirrjet e demokratëve “Basha, Shqipëria është me ty”, dhe “E duam Shqipërinë si gjithë Evropa”, duke mbyllur kështu edhe protestën e Opozitës së Bashkuar e cila nisi në orën 10:00 para Parlamentit të Shqipërisë ndërsa po zhvillohej seanca plenare.
