Protesta e Opozitës/ Tensione, Paloka thirrje policisë: Mos u bëni pjesë e këtij pushteti kriminal!
Nënkryetari i Partisë Demokratike, Edi Paloka duke folur në Protestën e Opozitës para Parlamenti tha se fundi Edi Ramës ka ardhur, ai është vetëm një kufomë, një kufomë që zvarritet si zombie nëpër Shqipëri.
“Jemi përballë atij që jo vetëm emrin parlament nuk mund ta ketë më, por sot është kthyer në turpin e Shqipërisë dhe më larg. Sot, ata që në atë sallë përfaqësojnë vetëm krimin, përfaqësojnë vjedhjen, përfaqësojnë votën e blerë, po përpiqen dhe bëjnë sikur janë në normalitet, të luajnë rolin sikur janë në parlament, sepse kështu i duhet kryehajdutit, kryekriminelit,” tha Edi Paloka duke shtuar se jo Edi Rama, por skush nuk mund t’i rezistojë një populli që sot është ngritur për të shpërthyer jo në pakënaqësi, por në urrejtje ndaj një qeverie, që vetëm i vjedh dhe i grabit shqiptarët.
E keni parë vëllezër se ç’ndodhë çdo ditë. Ai nuk di të ndalet. Përditë dhunë ndaj shqiptarëve. E patë dje, tha Paloka, edhe përballë fermerëve që derdhnin qumështin. Forca speciale përballë studentëve, forca speciale përballë popullit, forca speciale tek Unaza e Re, kërkon t’i nxjerrë nga shtëpitë. A mund të rezistojë një qeveri që përdor popullin përballë forcave speciale?
“Unë kam një thirrje edhe për ata policë të ndershëm që vërtetë janë aty dhe janë me një rrogë sa për të mbajtur familjen, edhe ata militantë, bashkëpunëtorë e kriminelë si ndërtuesit e tyre, por me policët e ndershëm, mos u bëni pjesë e këtij pushteti kriminal, mos dilni kundër vëllezërve dhe motrave tuaja. Jemi këtu për të drejtat e tyre por edhe për të drejtat tuaja, që edhe ju të jetoni si njerëz. Mos u ktheni kundër qytetarëve. Sa për ju kriminelët e tjerë, që mbani veshur me uniformat e policisë, tashmë jeni tërësisht në shërbim të një pushteti kriminal, dijeni që do të mbani përgjegjësi deri më një. Asnjë prej jush që sot shkel ligjin dhe dhunon popullin e tij nuk do të rrijë pa përgjigje nesër, bashkë me ndërtuesit tuaj, bashkë me kryekriminelin,” tha Nënkryetari i PD duke shtuar:
“Ju bëj thirrje, qytetarë këtej dhe matanë, bëhuni bashkë një orë e më parë ta largojmë këtë qeveri. Një orë e më parë të mbarojnë vuajtjet për shqiptarët. Sa më shumë ta zgjasë agoninë Edi Rama në karrigen e tij aq më shumë do trë shtohen vuajtjet për shqiptarët. Kjo rrugë nuk ka më kthim. Kush nuk e ka kuptuar, e ka për faj të tij. Shqiptarët nuk kthehen më prapa,” tha Nënkryetari i Partisë Demokratike, Edi Paloka duke e bërë të qartë se nuk ka Shqipëri në Europë me Edi Ramën, nuk ka Shqipëri në Europë me banda dhe krim që blejnë dhe vjedhin vota ndërsa përfundoi: “Ta kuptojnë shqiptarët dhe ndërkombëtarët se sa të jetë Edi Rama në atë karrige, nuk do të ketë asnjë ditë qetësi për krimin, nuk do të ketë asnjë ditë qetësi për këtë qeveri, nuk do të ketë asnjë ditë qetësi për ata që kërkojnë t’i mbajnë shqiptarët nën zgjedhë.”
