Protesta e Studentëve/ Pas mbledhjes: Rama të mos guxojë të cënojë kauzën tonë. Ja cili është plani…

Protesta e Studentëve vazhdon ashtu si edhe bojkoti i mësimit, dhe studentët do të vazhdojnë të qëndrojnë të ngujuar në Fakultet. Kështu u shprehën studentët përmes një deklarate për media pas një mbledhje përreth një orë mes studentëve që u zhvillua në ambientet e Fakultetit Ekonomik.

Më herët në këtë fakultet, studentëve të ngujuar prej tre ditësh, u janë bashkuar edhe rreth 200 studentë të tjerë për të bërë një mbledhje e për të vendosur se çfarë do të behët me protestën e tyre, e cila tashmë është kthyer në grevë urie.

Studentët janë shprehur njëzëri se nuk do të futen në mësim dhe kërkojnë që kryeministri Edi Rama të plotësojë të gjitha kërkesat e tyre të parashtruara që në fillim të muajit dhjetor, e këtë duhet ta bëjë me ligj, pasi ata shprehen se nëse nuk miratohen me ligj, nuk kanë besim.

“Ligji për arsimin e lartë duhet rrëzuar, Universiteti është i yni dhe tani do të ngujohemi të gjithë. Partitë politike t’i mbajnë larg këlyshët e tyre. Rama të mos guxojë të cënojë kauzën tonë. U bëjmë ftesë edhe pegadodëve të na bashkohen. Ngujimi do të jetë pa afat”, janë shprehur studentët.

Rama: Nga nesër në sekretariatet e universiteteve do të…

Kryeministri Edi Rama në prag të mbledhjes së studentëve ka bërë të ditur përmes rrjetit social Twitter se duke filluar nga nesër në sekretaritë e fakulteteve do të ketë përfaqësues të ministrisë së Financave për të asistuar studentët.

“Nga nesër në sekretariatet e universiteteve do të vendosen dy përfaqësues të ministrive të financave e të arsimit, për të asistuar studentët që duan shpjegime apo duan të adresojnë probleme specifike, lidhur me zbatimin e VKM mbi tarifat e bursat brenda janarit #MeStudentët“.