Protesta më e madhe në historinë e Shqipërisë demokratike!
Akti i djegies së mandateve, përkundër propagandës së intensifikuar të Edi Ramës dhe akuzave pa fund kundër opozitës, sot dha rezultatin konkret: Protesta më e madhe në historinë e Shqipërisë demokratike!
Pas një jave dhune dhe terrori të policisë nën mbikëqyrjen e kryeministrit, Bulevardi “Dëshmorët e Kombit” ishte i vogël për të marrë të gjithë ata që kishin vendosur të protestojnë kundër regjimit të Edi Ramës dhe qeverisjes së tij shkatërrimtare.
Pengesat e shumta policore për përdorimin e dronit nga ana e mediave, dhe anashkalimi i vlerësimit të pjesëmarrësve në protestën e sotme si nga kryepolici Veliu si dhe mediat e afërta me Ramën, dëshmon se sot pjesëmarrja masive në protestat e opozitës është bërë shqetësim serioz për Kryeministrin.
Dje, u interpretua në mënyra të ndryshme refuzimi nga ana e Sandër Lleshajt për vendin e protestës që ishte theksuar në kërkesën e PD, por sot është e qartë se pjesëmarrja e sotme dhe forma “marshim” e protestës, është ajo që kishte krijuar panik si tek policia ashtu edhe kryeministri Edi Rama; Ky panik i Ramës rezultoi i arsyeshëm, meqë u pa qartë se radhët e opozitës dukshëm po shtohen.
Me terror dhe propagandë të Edi Ramës, me ose pa lejen e policisë për të filmuar me dron, sot u dëshmua se protesta e qytetarëve u shtri jo vetëm përgjatë Bulevardit “Dëshmorët e Kombit”, por duke filluar nga Sheshi Nënë Tereza, zonën përreth Piramidës, Kryesisë së Parlamentit dhe deri në sheshin “Skënderbej”. Numri shumë më i madh protestuesve se sa në protestën madhështore të 16 shkurtit është fitorja e parë e opozitës pas djegies së mandateve. Ky akt politik i cili buroi nga populli dhe prodhoi protestën më të madhe në historinë e Shqipërisë demokratike, nuk konfirmon vetëm mbështetjen qytetare për opozitën por dhe rrugën e drejtë dhe të vetme për zgjidhjen e krizës politike në Shqipëri, që i jep fund Qeverisë dhe Parlamentit të krimit!
