Protesta në Beograd/ Kompromisi i Vuçiçit për Kosovën, tradhëti!

Derisa Presidenti i Serbisë vazhdon me propagandën e tij qeverisëse dhe kundër opozitës e mediave, radhët e protestave në Beograd, shtohen gjithnjë e më shumë.

Kështu ndodhi edhe sonte, fundjavën e gjashtë me radhë ku mijëra serbë protestuan në Beograd kundër presidentit të tyre Aleksandar Vuçiç dhe Partisë së tij Përparimtare Serbe, SNS, me kërkesa për lirinë e mediave, dhënien fund të sulmeve ndaj gazetarëve dhe figurave opozitare, si dhe kundër një traktati sekret me Kosovën.

Protestuesit në Beograd kanë akuzuar Vuçiç in se po përgatit një zgjidhje të negociuar me Kosovën, kusht ky kyç për Serbinë që të anëtarësohet në BE.

“Vuçiqi bën kompromise me gjithkënd, me presidentin e Kosovës, Hashim Thaçi, me kryeministrin e Kosovës, Ramush Haradinajn, me të gjithë përvec se me njerëz të ndershëm. Ky është një kompromis për tradhëti,” tha para turmës që brohoriste politikania serbe e Kosovës, Rada Trajkoviç.

Protestuesit kërkuan që qeveria të gjejë përgjegjësit e vrasjes së Oliver Ivanoviçit, politikanit serb të Kosovës, i vrarë një vit më parë. Ata njoftuan po ashtu se do të mblidhen në Beograd të mërkurën në përkujtim të vdekjes së tij.

Protestuesit e mbledhur nga Aleanca për Serbinë, një grupim prej 30 partish politike të opozitës dhe organizata, marshuan nëpër rrugë duke brohoritur “Vuçiç hajni”, që shënon kështu edhe protestën e gjashtë në po kaq javë, raporton Reuters.

Ky tubim i opozitës u organizua ne prag te vizitës së Presidentit te Rusise, Vlladimir Putin, në Beograd që pritet të zhvillohet të enjten.

Derisa Vuçiç i thotë se anëtarësimi në Bashkimin Evropian mbetet qëllimi përfundimtar i Serbisë, ai mban lidhje të ngushta me Rusinë, aleatin e vjetër sllav dhe ortodoks.

Vizita e Putinit po shihet si shtysë për popullaritetin e Vuçiçit dhe koalicionit të tij qeverisës, ndërsa përkrahësit e tij kanë organizuar një tubim të madh të enjten për të mirëpritur presidentin rus.