Protesta në Beograd/ Mesazhi për Vuçiçin: Mos gënje dhe mos vjedhë më, dëgjo se çfarë po të thotë populli…
Me një minutë heshtje për jetët e humbura në tragjedinë hekurudhore në Nish filloi protesta e tretë qytetare në Beograd me moton “Njëri prej pesë milionëve”.
“Sot para juve jam si i pastrehë, me rroba të marra borxh” tha sot në protestën e cila u zhvillua pa simbole partiake, para Fakultetit Filozofik në Beograd, gazetari Millan Jovanoviç, të cilit kohë më parë i është djegur shtëpia në përpjekjen për ta eleminuar. Kur mora ftesën nga organizatorët e protestës, tha ai, mendoja ta refuzoja, sepse nuk jam figurë partiake.
“Unë jam qytetar i thjeshtë si gjithë ju që jeni këtu, mund të shohë se çfarë nuk shkon mirë në këtë shtëpinë tonë të përbashkët. Sot njerëzit heshtin nga frika, fjala është bërë e rrezikshme. Për shkak të fjalës mund ta humbasësh kokën siç ndodhi me mua, gati sa nuk e humba vetëm pse në mediat lokale ashtu si edhe në të gjitha institucionet, publikisht dhe me argumente kam folur për krimin dhe korrupsionin,” tha Jovanoviç.
Aktori Branisllav Trifunoviç kishte një mesazh për presidentin e Serbisë:
“Gjithnjë e më shumë jemi të tërbuar, nëse më dëgjon, po të them, mos gënje më dhe mos vjedhë, dhe dëgjoje se çfarë po të thotë populli. Populli i cili nuk jeton nga sanduiçet dhe listat tuaja, nga zgjedhjet tuaja në të cilat nuk do të marrim pjesë,” tha Trifunoviç i cili lexoi edhe letrën e akademikut Lubo Simoviç, i cili nuk ishte prezent në protestë.
“Mesazhi popullit se mund të fitojnë vetëm në zgjedhje është më shumë se cinike, siç dihet zgjedhjet zhvillohen me rregullat dhe zgjedhjet e Vuçiçit,” thekson Simoviç në letrën e tij.
Karikaturisti Petriçiç tha se proteston në emër të prindërve të tij të cilët e kanë mësuar që ta dalloj të ndershmen nga e pandershmja, si dhe në emër të miqve dhe familjes.
“Protestoj në emër të katër fëmijëve të mi, gjashtë nipave, mendjes së shëndoshë, e gjitha kjo e përmbledhur në vendimin tim që të dalë në rrugë,“ tha Petriçiç duke shtuar se lufta kundër këtij regjimi nuk është çështje politike por civilizuese, me shpresën që në krye të protestës do të jenë të rinjtë.
Me përfundimin e këtij fjalimi, aktori Branisllav Trifunoviç ftoi protestuesit ta bëjnë marshimin sipas itinerarit të përcaktuar nga Fakulteti Filozofik deri tek Qeveria, ku u dëgjuan edhe thirrje kundër këtij regjimi.
Ndryshe, tri kërkesat drejtuar Qeverisë dhe Presidentit, për të cilat edhe po zhvillohen protestat në Beograd janë: të zbulohet urdhëruesi i vrasjes së Oliver Ivanoviçit, kush ka tentuar ta vras Borko Stefanoviçin dhe ti thuhet opinionit se kush është ai që ka tentuar ta vras gazetarin Millan Jovanoviç
Protestat qytetare filluan më 8 dhjetor pas sulmit ndaj Borko Stefanoviçit, me moton “Stop këmishave të përgjakshme”. Fundjavën e kaluar protesta u zhvillua me moton “Hajde të shohim sa jemi”.
