Protesta në Beograd: President, me këtë popull ju nuk guxoni të talleni më!
Edhe protesta e dhjetë me radhë në Beograd, me moton “Njëri prej pesë milionëve”, filloi para Fakultetit Filozofik për të vazhduar drejtë qendrës së qytetit ku mediat raportojnë se ishte njëra ndër protestat me numrin më të madh të pjesëmarrësve.
Shkrimtari Marko Vidojkoviç duke folur në protestë tha se këtu kemi ofertën e plotë politike në momentin kur ta përzgjedhim.
“Kjo ofertë do ta bëjë kontratën me popullin, këtë po e bëjnë, por kjo kontratë duhet të respektohet. Siç tha dikush, dikur, vetëm po ju shikojmë,” tha Vidojkoviç dhe protestuesit vazhduan itinerarin e zakonshëm deri tek godina e televizionit publik serb, RTS.
Para Presidencës ata kërkuan dorëheqjen e Aleksandar Vuçiçit ndërsa në derën e Qeverisë së Serbisë vendosën shiritat “Njëri prej pesë milionëve” ku mbajti dhe fjalim, Jellena Anasonoviç:
“Mirëmëngjes Serbi. Mund të na kërcënojnë, frikësojnë por ne nuk dorëzohemi. President, me këtë popull ju nuk guxoni të talleni më. Kemi vetëm edhe një mesazh: Sërbia është ngritur, nuk ka më të ndalur. Ky është vendi ynë, njerëzit tanë. Gjithsesi jemi më shumë. Takohemi të shtunën e ardhshme në orën 18,” tha ajo duke përfunduar kështu edhe protestën e kësaj fundjave.
Sonte protestës iu bashkuan edhe studentët e Fakultetit të Shkencave Politike, Fakultetit të Komunikacionit, FON-it dhe ETF-së të cilët para se ti bashkohen protestës zhvilluan një tubim para konviktit të studentëve “4 Prilli”.
Organizatorët e protestës kishin bërë apel që sonte të mos përdoret kurrfarë simbolike të litarit për varje, siç u bë problem në protestën e kaluar, sepse sipas tyre simbole të këtij lloji nuk janë mesazh i protestës kundër dhunës.
Por gazetari i Agjencisë serbe të lajmeve “Tanjug” duke raportuar nga protesta tha se në mesin e protestuesve sërish kishte litar të përgatitur për varje, e njërin prej tyre e mbante deputeti i grupit ekstremist “Dveri”, Srgjan Nogo.
Ndryshe, protesta të ngjashme qytetare sonte janë zhvilluar nëpër qytete të ndryshme të Serbisë, si Brus, Aleksandrovc, Kragujevc, Pirot, Prokuple, Gornji Millanovc, Jagodinë etj.
