Protesta në Beograd: Vuçiç hajn dhe i korruptuar!

Mijëra serbë u mblodhën sërish sonte në qendër të Beogradit për të protestuar kundër presidentit të tyre Aleksandar Vuçiç dhe partisë së tij, Partia Përparimtare Serbe, SNS.

Pas marshimit për javën e katërt me radhë në protestë paqësore, qytetarët e shumtë duke bërtitur “Vuçiç hajn”, kërkuan liri të mediave, fund sulmeve ndaj gazetarëve dhe politikanëve opozitarë, raporton Reuters.

Përkrahësit e Aleancës për Serbinë, një grup opozitar i përbërë nga 30 parti dhe organizata, thonë se Vuçiç është një autokrat dhe partia e tij është e korruptuar, diçka që liderët e saj e mohojnë kategorikisht.

Në një intervistë në televizionin pro-qeveritar “Studio B TV” gjatë protestës, Vuçiç tha se ishte i gatshëm të diskutonte rreth kërkesave të opozitës.

“Jam i gatshëm të shikoj se çfarë e shkakton pakënaqësinë tek populli”, tha ai, pasi u brohorit nga disa protestues teksa po hynte në ndërtesën e televizionit, raporton KTV.

Vuçiç më herët tha se ishte i gatshëm të testonte popullaritetin e partisë së tij në zgjedhje të shpejta, por ish-ministri i Jashtëm dhe kryetar i Partisë së Popullit, Vuk Jeremiç si pjesë e kësaj aleance, tha se opozita do të bojkotonte çdo zgjedhje. “Nuk do të ketë zgjedhje legjitime në Serbi me pjesëmarrjen e opozitës derisa të krijohen kushtet normale për zgjedhje dhe për jetesë!”