Protesta në Fier/ Fushata e gjobave, Baçi:Banorët po vidhen pa mëshirë!
Sot në Fier kanë shpërthyer protestat për shkak të represionit shtetëror nga faturat e energjisë deri tek fushata e gjobave e tatimeve që po përshkallëzohet çdo ditë e më shumë.
Banorët e Povelçës në Fier protestuan sot kundër abuzimit të OSHEE- së me faturat e energjisë pas ndërrimit të matësve të energjisë. Kryetari i Partisë Demokratike Dega Fier, Luan Baçi, në mbështetje të protestës së banorëve denoncoi vjedhjen nga kompania e shpërndarjes së energjisë.
“Është një abuzim shumë i rëndë me matësit e energjisë elektrike. Matësit janë hequr nga OSHEE pa paralajmërim, janë montuar sahate të rinj dhe u kanë faturuar afrofe energji elektrike në shuma të konsiderueshme lekësh. Kjo është një vjedhje e hapur. Bëhet për të mbuluar deficitet e tyre,” tha Luan Baçi duke shtuar se të revoltuar për vjedhjet dhe padrejtësitë e shtetit janë edhe banorët e Hoxharës dhe Darzezës.
“Në Darzezë ka një bojkot nga nxënësit, pasi qeveria u prishi shkollën në mënyrë abuzive, pa dhënë prova se u dëmtua nga tërmeti. Transporti për nxënësit është i pasiguruar,” tha Kryetari i Partisë Demokratike Dega Fier, duke i denoncuar si selektiv dhe të padrejtë aksionet e tatimorëve gjatë 3 ditëve të fundit në Fier.
“Janë lëshuar mbi bizneset e qytetit si hordhi, duke i gjobitur në mënyrë selektive, duke i ndarë qytetarët sipas bindjeve partiake apo pjesëmarrjes në protesta, kanë vënë gjoba marramendëse kundër bizneseve që nuk janë në shkelje të ligjit,” tha Kryetari i Partisë Demokratike Dega Fier, Luan Baçi, duke garantoi banorët për mbështetjen e panderprerë të PD për çdo protestë që godet padrejtësinë, arrogancën dhe vjedhjen që u bëhet nga qeveria dhe bashkia.
