Protesta/ RAI 3 i tha botës, Noka: Në zyrën e kryeministrit ulet krimi i organizuar!
Përveç betejës për të vërtetën në seancë plenare të Parlamentit të Shqipërisë, deputetët e Partisë Demokratike u angazhuan edhe në protestën e opozitës para Kuvendit, ku Sekretari i Përgjitshëm i PD, Flamur Noka, para protestuesve tha se u desh RAI3, BILD dhe Washinton Examiner që t’i thonë gjithë botës se Shqipëria nuk ka kryetar qeverie, por ka kreun e narko-regjimit se në zyrën e kryeministrit ulet krimi i organizuar, karteli i Sinaloas, Ben Ndoka, Rrahman Rraja, Durim Bami, Behar Bajri e Pëllumb Gjoka, që Edi Rama t’i përdorë për të blerë vota dhe të bllokoj rotacionin.
“100 hapa larg nga ju po shikoni se si po zhvillohet një seancë narko-parlamenti. Parlamenti i turpit, parlamenti i drogës!
Atje keni përfaqësuesit tuaj, por pjesa tjetër janë përfaqësuesit e Ben Ndokës, janë përfaqësuesit e Rrahman Rrajës, janë përfaqësuesit e krimit të organizuar shqiptar. Ata janë përfaqësuesit e narko-shtetit.
Ajo Lindita atje, përfaqëson Eskobarin dhe jo vetën e qytetarit shqiptar. Ata deputetë atje janë përfaqësues të narko-shtetit dhe narko-regjimit.
Kanë 11 vjet që kanë bërë gjithçka për ta fshehur fytyrën e vërtetë të regjimit të Eskobarit të Surrelit dhe ata tashmë kanë blerë media, kanë blerë edhe politikanë të opozitës. Kanë bërë gjithçka edhe për të blerë ndonjë ndërkombëtar që vetëm e vetëm, realiteti i Shqipërisë…
U munduan dhe e futën shejtanin në shishe. Por jo. Menduan se shejtanit i vunë maskën e engjëllit dhe do të drejtonin për 11 vjet, t’ia shisnin këtë imazh gjithë botës perëndimore, gjithë botës së qytetëruar, por u deshën vetëm tri media, u desh RAI3 që t’i çjerrë maskën këtij regjimi dhe t’i thotë gjithë botës se në Shqipëri nuk ka qeveri por ka narko-shtet.
U desh RAI3, u desh BILD, u desh Washinton Examiner që t’i thonë gjithë botës se Shqipëria nuk ka kryetar qeverie, por ka kreun e narko-regjimit.
U deshën tri media që të nxjerrin të palarat e këtij shteti kriminal,” tha Sekretari i Përgjithshëm i Partisë Demokratike, Flamur Noka, duke përfunduar:
“U desh një media si RAI3 që t’i tregojë gjithë botës se në zyrën e kryeministrit, aty ulet krimi i organizuar, në ato karrige ku duhej të uleshin partnerët tanë kur vijnë në takime zyrtare.
Por në ato karrige është ulur karteli i Sinaloas, në ato karrige Rama ka ulur Ben Ndokën, Rrahman Rrajen, ka ulur Durim Bamin, ka ulur Behar Bajrin, ka ulur Pëllumb Gjokën, ka ulur gjithë krimin e organizuar shqiptar vetëm e vetëm me një qëllim që t’i përdorë për të blerë vota dhe bllokuar rotacionin, që është gjëja më e shëndoshë në një demokraci.”
