Protesta/ S’kemi ardhë për dhunë, Basha: Qeveri tranzitore, zgjedhje të parakohshme, fund qeverisë…
Asnjë protestues nuk erdhi për të kryer akte dhune. Kështu u shprehë kryetari i Partisë Demokratike, Lulzim Basha, pas tensioneve që u krijuan para portës së Kryeministrisë dhe gjuajtjeve të shfrenuara të gazit lotsjellës nga ana e policisë mbi protestuesit, duke ee bërë të qartë edhe qëllimin politik të protestës.
“Siç e patë edhe ju, patë një hapje të menjëhershme dhe të çuditshme të gardhit të oficerëve të policisë që mbronin perimetrin e kryeministrisë. Kjo është qartësisht pjesë e një plani për të provokuar futjen e protestuesve në selinë e Kryeministrisë, sepse në asnjë rast policia dhe gardhi policor, edhe kur kanë presion shumë më të madh, nuk hapet në këtë mënyrë. Pra ka pasur një skenar të mirëmenduar madje të paralajmëruar nga Edi Rama për të çuar në dhunë dhe konfrontim. Në qëndrojmë në krah të tyre dhe do të vazhdojmë të qëndrojmë në krah të qytetarëve deri në fund,” tha Lulzim Basha duke e bër ëtë qartë edhe qëndrimin politik të kësaj proteste:
“Qeveri tranzitore, zgjedhje të parakohshme, t’i japim fund qeverisë, që është kapur në vjedhje tek Unaza, tek Teatri, është kapur në vjedhje të votave. Në çdo vend të Europës, kur qeveria kapet në vjedhje, ikën qeveria dhe shkon në burg hajdutët, nuk vuan populli. Populli e ka kuptuar këtë dhe është bashkuar në një protestë më të madhe në këto 30 vite.”
Për ata që akuzojnë opozitën për përdorim dhune në protestë lideri i opozitës sqaroi se asnjë prej protestuesve këtu nuk erdhi për të kryer akte dhune:
“Asnjë protestues nuk erdhi për të kryer akte dhune. Ju e dini fare mirë se si organizohen protestat e dhunshme. Ato u provokuan dhe u nxitën nga një skenar i mirëmenduar i Edi Ramës dhe i ekzekutuar nga një grusht policësh të korruptuar dhe të lidhur me krimin.”
Në fund, kryetar i Partisë Demokratike, Lulzim Basha, kishte një porosi të veçantë si për protestuesit ashtu edhe policët në detyrë: “U bëj thirrje të gjithë efektivëve të policisë të ruajnë qetësinë si kundër, u bëj thirrje qytetarëve të vazhdojnë të rrinë të bashkuar për të drejtat e tyre.”
