Protesta vendimtare/ 16 Mars, Basha: T’ia kthejmë Shqipërinë, SHQIPTARËVE!
Pasi kanë dorëzuar në KQZ formularët e 103 kandidatëve nga listat e Partisë Demokratike që refuzojnë marrjen e mandatit të deputetit, kryetari i PD, Lulzim Basha me Aleatët u nisën drejtë selisë së demokratëve ku dhe u bë përmbyllja zyrtare e Protestës së Opozitës së Bashkuar, me thirrjen drejtuar të gjithë qytetarëve shqiptarë të marrin pjesë në një tjetër akt të madh, më 16 mars në protestën vendimtare për t’ia kthyer Shqipërinë zotërve të saj të vërtetë, shqiptarëve të lirë dhe të bashkuar.
“Sot në të katërtën protestë radhazi populli i bashkuar ka përfunduar etapën e fundit të asgjësimit të asamblesë së krimit dhe nxjerrjen e kësaj asambleje lakuriq para botës si kazan i plehrave, i horrave, i hajdutëve dhe i kriminelëve.Por dita e sotme ka një rëndësi që shkon përtej të treguarit të fytyrës së shëmtuar të pushtetit që sundon, vjedh dhe mashtron sot shqiptarët. Ka meritën e ndezjes së shpresës, besimit, të çdo shqiptari për të nesërmen që po vjen,” tha Lulzim Basha pas më shumë se 6 orë proteste duke çuar një herë e mirë në shtëpi parlamentin e krimit, parlamentin ilegjitim dhe kemi hapur përfundimisht shtegun e vetëm përmes së cilës do të kalojë e ardhmja e çdo shqiptari.
“Zgjidhja e vetmja politike është largimi një orë e më parë i shkaktarit kryesor, autorit dhe përfituesit, kryezullumqarit Edi Rama. Ikja e tij është fundi i pjesës së parë të kësaj beteje e cila do të vazhdojë me bashkimin më të madh të shpresës dhe besimit që shqiptarët kanë njohur në këto 3 dekada.”
Edi Rama ka mbaruar, regjimi i tij ka marrë fund sado të përpiqet ta zgjasë agoninë e tij, aq më shumë do t’i shtohet makthi dhe fatura para popullit që do ta paguajë para drejtësisë, tha lideri i Opozitës duke i bërë thirrje qytetarëve të lirë shqiptarë të marrin pjesë në një tjetër akt vendimtar:
“Të hapjes të portave të shpresës, të hapjes të portave të Europës, të zgjedhjeve të parakohshme të lira dhe të ndershme pa Edi Ramën dhe horrave e kriminelët e tij, në një akt tjetër të madh që do të na bashkojë dyfish, trefish më shumë se më 16 shkurt: më 16 mars në protestën vendimtare për ta përcjellë kufomën politike të sektit kriminalë të rilindjes, për të çliruar Shqipërinë, për të shpëtuar të ardhmen tonë, për të çliruar zgjedhjet, për të çliruar ekonominë, madje dhe për të çliruar edhe Partinë Socialiste.”
Duke falënderuar të gjithë ata që sot dorëzuan në një akt solemn në KQZ mandatet vijuese duke i dhënë vulën e pakthyeshme betejës popullore për liri dhe demokraci ai iu drejtua, siç tha, çdo nëne e çdo prindi e çdo babai, që të mos kenë frikë: “Asgjë nuk do ta ndalë popullin nga vullneti për të marrë në dorë fatet e tij. Ajo që po vjen është çlirimi i juaj, ajo që po vjen është liria juaj, ajo që po vjen është sovraniteti juaj, ajo që po vjen është fundi i arrogancës, fundi i hajdutërisë, fundi i krimit të bërë njësh me qeverinë, ajo që po ndërtojmë të gjithë ne së bashku është Shqipëria e shqiptarëve me dinjitet, me mirëqenie dhe më mundësi sot e sa të jetë jeta,” tha kryetari i Partisë Demokratike, Lulzim Basha, duke i siguruar se kurrë më errësira e krimit, perversiteti i hajdutërisë nuk do të vendosë për ju dhe fëmijët tuaj ndërsa përfundoi:
“Ora e Shqipërisë europiane po troket. Ora e largimit të Edi Ramës po troket mbrapsht tik -tak, tik -tak! E duam Shqipërinë si gjithë Europa! Mirënjohje për këtë bashkim të jashtëzakonshëm dhe gati për uraganin e pamposhtshëm popullor më 16 mars që do të pastrojë horizontin e do t’ia kthejë Shqipërinë zotërve të saj të vërtetë, shqiptarëve të lirë dhe të bashkuar.“
