Protestat e studentëve në Serbi, Vuçiç: Edhe Trump është zgjidhje jashtë sistemit!
Nuk e pranon se ka krizë shoqërore në Serbi ndonëse radhët e protestës së studentëve në Beograd sa shkojnë e shtohen, thotë se studentët po kërkojnë zgjidhje jashtë sistemit, por Presidenti serb Aleksandar Vuçiç, sqaron se edhe Presidenti i zgjedhur amerikan, Donald Trump, ishte zgjidhje jashtë sistemit.
Aktualisht, thotë Vuçiç, problemi më i madh në Serbi nuk është protesta e studentëve por gjeopolitika.
“Nuk mendoj se ka krizë të madhe shoqërore. Po, e shoh se është problem i madh se populli po shqetësohet pse po bllokohen rrugët. Shqetësim shumë i madh, populli po nervozohet për këtë arsye. S’ka nevojë. Vetëm duhet durim,” tha Presidenti i Serbisë në një intervistë për televizionin publik serb, RTS, që nuk e komentoi numrin e madh të qytetarëve që përqafuan kërkesat e studentëve, por tha se ka kërkesa të studentëve që, për Vuçiçin, janë edhe të drejta.
“Ka mundësi që në një pjesë prej tyre edhe kanë të drejtë, por unë nuk i kuptoj plotësisht,” tha Vuçiç duke shtuar se studentët po kërkojnë zgjidhje jashtë sistemit.
“Njerëzit kërkojnë zgjidhje jashtë sitemit edhe në Gjermani. Edhe Trump është një zgjidhje jashtë sistemit. Kështu është në botë. Trump fitoi edhe ndaj Jennifer Lopez dhe Robert De Niro, sepse populli amerikan nuk e çanë kokën se kë e mbështesin ata. Edhe këtu disa nga opozita bëjnë gabime të tilla dhe në plan të parë i vendosin më të pasurit dhe më të njohurit,” tha Vuçiç por në vërejtjen e gazetarit se ata mbajnë pankarta të shkruara me shkronja cirilike, edhe për këtë kishte përgjigje ky mashtrues historik i popullit serb:
“Kjo nuk është rastësi!”
Dhe, si gjithmonë, kur ka krizë në Serbi, si politike ashtu dhe ekonomike, Aleksandar Vuçiç e gjenë zgjidhjen duke kontaminuar opinionin serb me zhvillimet në Kosovë.
“Më përpara mund të llogarisnim në mbështetjen e Rusëve dhe Kinezëve, tani ata vetëm mund ti kuptojmë. Kisha një bisedë të shkëlqyer me Lavrovin, do të shkoj më 9 Maj me Robert Ficon në Moskë. Por sot në Evropë i kuptojnë shumë më mirë zhvillimet në Kosovë. Dhe e dinë se kanë gënjyer, në veçanti në rastin e shpërthimit te Zubin Potoku në kanalin e Ibër Lepencit. Aksionet e fundit me regji të Albin Kurtit janë shprehje e pafuqisë së tij, dhe jo fuqisë. Këtë e kuptojnë sot në Serbi,” tha Vuçiç jashtë kontrollit pas zhvillimeve të fundit në Kosovë duke e shpallur edhe veten të pafuqishëm me ditët kur zhvillonte aksione me ushtrinë në kufirin serbo-kosovar, dhe, pavarësisht se Presidentin amerikan Trump e konsideron si zgjidhje jashtë sistemit nuk pret ndonjë ndryshim në politikën e Shteteve të Bashkuara ndaj Kosovës.
“Kemi bashkëbisedues dhe miqë në Administratën Trump, dhe besoj se diçka më mirë mund të pritet!”
Për zgjedhjet presidenciale në Kroaci tha se nuk pret asgjë, sepse sipas tij, të gjitha opcionet politike në këtë vend Serbinë e shohin si kundërshtar strategjik.
Në fund, nuk mund t’a mbyllte këtë intervistë pa një paralajmërim kombëtar dhe kështu ndodhi edhe në këtë shfaqje në televizionin kombëtar ku Presidenti i Serbisë, Aleksandar Vuçiç, përveç paralajmërimit për 31 Mars 2025 të nisjes së luftës më të madhe kundër korrupsionit shtoi:
“Për ju kam një lajm, do të formohet një lëvizje e madhe popullore në krye të së cilës nuk do të jem unë, por njerëzit do të mund të anëtarësohen duke filluar nga 15 Marsi 2025!”
