Protestat serbe drejt shuarjes, KFOR largon telat me gjemba

Ndonëse u përdorën nxënësit dhe të punësuarit në strukturat paralel, si në Zveçan ashtu dhe në Leposaviç e Zubin Potok, protestat serbe para godinave të komunave në veri nuk ishin masive, siç isht paralajmëruar; Ndërkohë BE ka reaguar duke theksuar se BE është e gatshme të organizojë takim të nivelit të lartë, në kuadër të dialogut mes Kosovës dhe Serbisë, sapo të krijohen kushtet.

Madje, duke vlerësuar situatën e sigurisë, pjesëtarë të misionit të NATO-s në Kosovë, KFOR, vendosën të heqin një pjesë të telave me gjemba që u vendosën ditë më parë, për të rritur sigurinë, raporton RFE.

Kjo nuk ndryshuar vendimin e KFOR-it edhe pas një incidenti të protestuesve me Policinë e Kosovës në Zveçan ku at abllokuan për disa minuta qarkullimin e një makine të Policisë.

Pas ndërhyrjes së KFOR-it, protestuesit serb hapën rrugën dhe pjesëtarët e Policisë së Kosovës lëvizën drejt destiancionit.

Ndërkohë Kryeministri i Kosovës, Albin Kurti, sot priti në takim Ambasadorin e Francës në Kosovë, Olivier Guerot dhe Zv/Ambasadorin e Gjermanisë në Kosovë, Matthias Conrad.

Mësohet se në këtë takim u diskutua për zhvillimet e fundit në tre komunat në veri pas ditës së parë të punës së kryetarëve të rinj dhe dhunës së shkaktuar ndaj ushtarëve të KFOR-it, Policisë së Kosovës dhe gazetarëve nga grupet ekstremiste serbe.

“U pajtuan për rëndësinë jetike të de-eskalimit të situatës. Kryeministri i njoftoi për profesionalizmin e lartë dhe integritetin e padiskutueshëm të Policisë së Kosovës në menaxhimin e situatës pa asnjë gabim apo defekt.

Vendosja e plotë e sundimit të ligjit në katër komunat në veri të Kosovës është e domosdoshme si për largimin e elementeve kriminale ashtu edhe për një fushatë të hapur dhe fer para zgjedhjeve të lira e demokratike në të ardhmen. U theksua gjithashtu nevoja për zbatimin e plotë, të shpejtë dhe pa kushte të Marrëveshjes Bazike të 27 shkurtit dhe Aneksit të saj,” thuhet në njoftimin e Zyrës së Kryeministrit duke shtuar se Albin Kurti ka falënderuar ambasadorin dhe zv/ambasadorin për interesimin e vazhdueshëm të Francës dhe Gjermanisë si dhe kontributin e tyre.

Ndryshe, I dërguari amerikan për Ballkanin Perëndimor, Gabriel Escobar, dhe i dërguari i Bashkimit Evropian për dialogun Kosovë-Serbi, Mirosllav Lajçak do të zhvillojnë takime me krerë më të lartë shtetërorë në Prishtinë dhe Beograd, më 5 dhe 6 qershor.

Zyra e kryeministrit të Kosovës, Albin Kurti ka bërë të ditur se takimi me diplomatët amerikano-evropian do të nisë në orën 20:00 në godinën e Qeverisë.

“Ata shkojnë për të vazhduar punën në zbatimin e thirrjeve evropiane dhe amerikane për Kosovën dhe Serbinë që të ulin menjëherë tensionet dhe të ndërmarrin hapa për zgjidhje të qëndrueshme. E platforma për këtë zgjidhje të qëndrueshme është gjithsesi në dialogun e lehtësuar nga BE,” ka sqaruar zëdhënësi i BE, Peter Stano ndërsa i pyetur për një takim të në të Kryeministrit të Kosovës, Albin Kurti dhe Presidentit të Serbisë, Aleksandar Vuçiç, shtoi:

“Natyrisht, ne jemi gjithmonë të gatshëm të jemi mikpritës të takimit në nivel të lartë, në kuadër të dialogut mes Kryeministrit Kurti dhe Presidentit Vuçiç, kur të ketë kushte, dhe kur të dy ata të pajtohen për diçka të tillë. Por, në këtë fazë, gjëja më e rëndësishme është që të ulen tensionet në terren dhe të ndërmerren hapa konkretë. Dhe pikërisht për këtë, ne e kemi të dërguarin e posaçëm të BE-së Miroslav Lajçak. Ai pasi të jetë në Prishtinë dhe Beograd, do të raportojë te Përfaqësuesi i Lartë, Josep Borrell, e Përfaqësuesi i Lartë do t’i njoftojë vendet anëtare, për të vendosur për hapat e mëtejmë.”