Protestë kombëtare, Berisha: Beteja e madhe nis më 12 nëntor!

Pas konsultimeve me Aleatët, Kryetari i Partisë Demokratike, Sali Berisha, bëri të ditur se më 12 Nëntor do të zhvillohet protesta kombëtare kur dhe fillon beteja e madhe kundër regjimit të narkoshtetit të parë dhe të vetëm në Europë.

“Opozita, PD dhe PL dhe forca të tjera opozitare nisin me datën 12 nëntor betejën e madhe kundër regjimit të urryer, regjimit të narkoshtetit të parë dhe të vetëm në Europë, të partisë shtet, regjimit të Edi Ramës.

Në të katër anët e Shqipërisë po bien sirenat e urrejtjes të monizmit të Edi Ramës. Po bien sirenat e alarmit ndaj gjendjes katatstrofale të krijuar nga vjedhjet e fondeve dhe pasurive publike të qytetarëve shqiptarë,” tha Berisha duke shtuar se shqiptarët do bashkohen në protestën më të madhe që ka njohur Shqipëria më 12 nëntor.

“Ka pasur dhe ka një interes të jashtëzakonshëm për protestat dhe përballjet me regjimin e partisë-shtet. Unë kam besimin më të madh se të rinjtë, të rejat e Shqipërisë, që ndodhen në vend dhe ata që janë larguar për shkak të pamundësisë së tyre për të përballuar jetën në Shqipëri, burrat dhe gratë e këtij vendi, do bashkohen në protestën më të madhe që ka njohur Shqipëria më 12 nëntor, për t’i dhënë përgjigjen e merituar, Edi Ramës dhe klikës së tij në pushtet.”

Edi Rama, armik i egër i votës së lirë, ky është një plaçkitës i paskrupullt përmes shtetit elektoral, patronazhistëve të kuq dhe bandave kriminale e parave të drogës, tha Berisha, nuk meriton të qëndrojë në pushtet asnjë ditë

“Ky është një armik i egër i votës së lirë, ky është një plaçkitës i paskrupullt përmes shtetit elektoral, patronazhistëve të kuq dhe bandave kriminale e parave të drogës. Ky është një armik i egër i interesit të shqiptarëve.

Se cili është Edi Rama e ka marrë vesh çdo shqiptar në Shqipëri dhe jashtë. Deklaratat e tij se do zëvendësojë punëtorët shqiptarë me punëtorë të marrë nga Bangladeshi, në të vërtetë trafik i turpshëm i qenieve njerëzore, deklaratat e tij se nuk do lejojë në universitete nxënësit me nota të ulëta, se do marrë jashtë studentë, deklaratat e tij se ikin, por fajin e ka Gjermania, janë dëshmi e zbatimit nga ana e tij të politikës së Vaso Çubrolloviçit,” tha Kryetari i Partisë Demokratike duke shtuar se nga viti 2014 deri më sot, janë larguar nga Shqipëra 27 për qind e materies shqiptare.

“Nuk ka luftë civile që në një hark kohor të tillë të shkurtër, të ketë larguar nga vendi 27 përqind të kombit apo shoqërisë. Edi Rama është një antishqiptar i pakorrigjuar. Në samitin e fundit në Pragë, padroni i tij Vuçiç do i drejtohej audiencës: kam 17 vite që përpiqem me udhëheqjen politike të Kosovës dhe nuk arrij asnjë marrëveshje, ndërkohë me sivllaun tim binjak, Edi Rama biem dakord në çdo gjë dhe merremi vesh për çdo gjë. Ky është Edi Rama për çdo shqiptar,” tha Kryetari i Partisë Demokratike, Sali Berisha, ndërsa bëri publike datën e protestës së madhe kombëtare, 12 nëntor, përfundon:

“Pra në çdo plan ky nuk meriton të qëndrojë në pushtet asnjë ditë. Ky meriton të largohet një minutë e më parë. Pas Enver Hoxhës, ky është armiku i dytë më i madh i njeriut, qenies, votës, buxhetit familjar, buxhetit shtetëror dhe të gjithave me radhë.”