Protestë Kombëtare, Berisha: Sot, në ora 17:00 është dita e betejës sonë!
Sot, në ora 17:00 është dita e betejës sonë, është ky mesazhi i Kryetarit të Partisë Demokratike, Sali Berisha, për protestën e sotme kombëtare duke i bërë thirrje të gjithë qytetarëve të Tiranës dhe të mbarë Shqipërisë të vërshojnë në Tiranë në mosbindje civile për të dridhur themelet e narkodiktaturës.
“Sot, në ora 17:00 është dita e betejës sonë, të gjithë sa janë qytetarët e Tiranës dhe të mbarë Shqipërisë vërshojnë në Tiranë në mosbindje civile për të dridhur themelet e narkoshtetit, narkodiktaturës dhe për të ecur, për ta festuar vitin e ri të sigurtë, në fitoren që meritojnë,” tha Sali Berisha para demokratëve në Degën 9 në Tiranë duke ju drejtuar shqiptarëve kudo që janë dhe po e vuajnë krimin shtetëror të Edi Ramës.
Ndërkohë për shkak të protestës, disa rrugë në Tiranë do të bllokohen, përfshirë: Rrugën pranë Bashkisë së Tiranës, rreth-rrotullimin tek “Zogu i Zi”, sheshin “Wilson”, “Pallatin me Shigjeta”, dhe kryqëzimin tek “Rruga e Elbasanit”, pranë xhamisë së “Namazgjasë”.
Edhe për protestën e sotme organizatorët kanë njoftuar Policinë e Tiranës se do të bllokojnë disa akse për rreth 3 orë ndërsa Policia e Shtetit në përgjigje thekson se ajo garanton çdo tubim paqësor, por jo bllokimin e rrugëve dhe se çdo akt i tillë përbën përgjegjësi penale.
Në bazë të ligjit “Për tubimet”, thotë Policia e Shtetit, organizimi i tubimeve në disa segmente rrugore në Bashkinë Tiranë krijon probleme dhe premisa për cenime të rendit publik dhe sigurisë së shtetasve të tjerë, pengon qarkullimin e automjeteve të emergjencës, cenon të drejtat dhe liritë themelore për lëvizjen e lirë të shtetasve, si dhe pengon lëvizjen e lirë të automjeteve të transportit publik dhe privat në kryeqytet. Për mbarëvajtjen e rendit dhe të sigurisë gjatë protestës, Policia do të përdorë forcat e rendit, të Shqiponjave dhe FNSH.
Ndryshe, kjo protestë është e para pas lirisë së rifituar të liderit të opozitës, Sali Berisha, pas një viti, me vendimin e GJKKO më 27 nëntor 2024, për të revokuar masën e sigurisë “arrest shtëpie” që iu dha për rastin “Partizani”.
Protesta e fundit e opozitës u zhvillua më 26 nëntor, ku për tre orë u paralizuan disa nga nyjet kryesore të kryeqytetit. Kundër këtij bllokimi, durimin e humbën të gjithë ata qytetarë që nga viti 1944 nuk e humbin dot durimin nga regjimi kriminal i komunistëve të Edi Ramës.
