Protestë Kombëtare në Tiranë, Berisha: Ballkani i Hapur do hidhet poshtë, kur PD të vijë në pushtet
Duke renditur pika e synimit serb përmes projektiti “Ballkani i Hapur” me epilogun final të vendosjes së hegjemonisë serbe në rajon, lideri historik i Partisë Demokratike, Sali Berisha, në protestën e organizuar mbrëmjen e sotme kundër prezencës së Presidentit të Serbisë në Tiranë, tha se në protestë marrin pjesë të gjithë qytetarët e Maqedonisë, Malit të Zi, Kosovës, Bosnjes dhe vetë Serbisë, të cilët e shohin këtë projekt si një përpjekje djallëzore për të zëvendësuar nismën e Berlinit, projektin për integrimin e vendeve tona në BE.
Duke e cilësuar protestën para Kryeministrisë në Tiranë kundër një projekti i cili shkon në kurriz të mbarë kombeve të Ballkanit, përveç Beogradit, Ish-Presidenti Sali Berisha e bëri të qartë se me ardhjen e PD në pushtet, “Ballkani i Hapur” do hidhet poshtë .
“Në këtë Bulevard, në Shqipëri dhe kudo që ndodheni sot përshëndetje vëllazërore. Në këtë protestë me të cilën ne ngrihemi fuqishëm në mbrojtje të interesave jetike të kombit shqiptar. Ne jemi mbledhur sot këtu për të protestuar kundër projektit fantazmë të aleancës trilaterale, Beograd, Tiranë Shkup. Apo Vuçiç e vasalët e tij Rama dhe Zaev. Në krye të radhës garantoj shqiptarët se kjo nuk është protestë kundër bashkëpunimit rajonal. Ne jemi dhe kemi qenë të angazhuar për bashkëpunim të sinqertë rajonal. Për integrime rajonale në BE e euroatlantike. Por kjo është protestë kundër një projekti që shkon në kurriz të Kombeve të Ballkanit. Kundër një projekti që është refuzuar në mënyrë kategorike nga Bosnja, Mali i Zi dhe Kosova. Kërcënim u shpall nga Kroacia,” tha Sali Berisha nga protesta kombëtare kundër prezencës së Presidentit të Serbisë, Aleksandar Vuçiç, të cilit i tha qartë se nuk është i mirëpritur në Tiranë.
“Kjo është protestë kundër një projekti i cili shkon në kurriz të mbarë kombeve të Ballkanit, përveç Beogradit. Kundër një projekti i cili është refuzuar në mënyrë kategorike nga Bosnje Hercegovina, Mali i Zi dhe Kosova. Ai është shpallur si kërcënim nga Kroacia. Një projekt i cili nuk synon gjë tjetër veçse vendosjen e hegjemonisë serbe në këtë rajon. Ne jemi kundër këtij projekti sepse historia ka faktuar se një nga dështimet më të mëdha në Ballkan, Europë dhe Botë ka qenë ideja e hegjemonizimit serb në gadishullin tonë.
Bie ndesh në mënyrë flagrante me interesin tonë kombëar. Në fillimet e tij ky projekt rindërtoi hartat e rajonit duke fshirë Kosovën si shtet i pavarur. Në fillimet e tij ky projekt vuri për maskë minishengenin për të mashtruar kombet e Ballkanit. Më vonë, projekti mori emrin Ballkani i Hapur, për të nderuar autorin apo propagandistin e Shoqërisë së Hapur i cili nuk ngurronte të promovonte ndarjen e Kosovës mbi bazën e linjave etnike të pastra,” tha Ish-Presidenti Berisha duke shtuar se sot protestojmë si shqiptarë në këtë shesh sepse Ballkani i Hapur është projekti me të cilin Vuçiç dhe Edi Rama kanë rrethuar Kosovën me një darë armiqësore dhe kërkojnë ta asgjësojnë pavarësinë e saj.
“Sot me ne protestojnë këtu të gjithë qytetarët e Maqedonisë, Malit të Zi, Kosovës, Bosnjes dhe vetë Serbisë, të cilët shohin në projektin djallëzor të Ballkanit të Hapur një përpjekje djallëzore për të zëvendësuar nismën e Berlinit, projektin për integrimin e vendeve tona në BE.
Lexoni letrën e tyre të sotme që këta aventurierë i drejtuan Brukselit. Në asnjë vend nuk flasin për vende të pavarura, për vende të barabarta. Asnjë fjalë, asnjë rresht nuk bëjnë fjalë për popuj sovranë, por për popuj në koncepsin e vjetër sllav. Nuk flitet për dhunimin e standardeve demokratike në këto vende si shkaku më kryesor i mbetjes së këtij rajoni në pritje për në Bashkimin Europian. Fajet sipas këtyre aventurierëve i ka Europa dhe vetëm Europa. Protesta jonë është protestë për vokacionin perëndimor të kombit shqiptar.”
Dhe jo vetëm kaq! Berisha me këtë rast sqaroi pse George Soro konsiderohet edhe si kumbar i Ballkanit Hapur.
“Vuçiç ka ardhur këtu si udhëheqësi i Ballkanit të Hapur, i tillë si udhëheqësi i aleancës trilaterale Beograd-Shkup-Tiranë, i tillë nuk do të jesh zotëri kurrë i mirëpritur në Tiranë. Jo dhe jo. Sepse nordi yt është Moska, sepse prapa nismës qëndron ideja serbomadhe, qëndron përpjekja për të shndërruar këtë zonë në zonë influence të Putinit. Serbia e Vuçiçit si ajo e Millosheviçit është shndërruar në Rusi e vogël dhe Rusia e vogël është rrezik për paqen, stabilitetin e Ballkanit dhe të Europës,” tha lideri historik i PD, Sali Berisha duke e bërë të qartë se projekti i Ballkanit të Hapur do të hidhet poshtë, kur Partia Demokratike të vijë në pushtet .
“Serbia të kërkojë falje dhe jo të mohojë gjenocidet. Kjo se ata që mohojnë gjenocidet, ata nuk duhet të kenë vend në botën e qytetëruar. Ballkani i Hapur do të hidhet poshtë kur PD të vijë në pushtet.
Ballkanin e Hapur nuk e mbështet Amerika, SHBA mbështet vetëm bashkëpunim mes vendeve sovrane. Soros është kumbar i Ballkanit të Hapur. Dua t’i bëj thirrje SHBA-ve, që të ndalojë politikat në diplomaci, që diktohen nga George Soros. Tradhtia dhe hajnia janë bërë bashkë me në krye Ramën.”
Krenar me sheshin plotë, me mijëra shqiptarë të Shqipërisë dhe të Kosovës, kryetari i FRPD dhe anëtari i Komisionit për Rithemelimin e PD, Belind Këlliçi, tha se Kryeministri Edi Rama mund ta ketë mik të zemrës Presidentin e Serbisë, por kurrë nuk mund ta bëjë mik të shqiptarëve.
“Nuk mund të ketë integrim Europian të Shqipërisë me Edi Ramën kryeministër. Unë jam krenar sot që në kohë rekord brenda vetëm 24 orësh, vetëm me njoftim në rrjetet sociale, ky shesh është mbushur me mijëra shqiptarë të Shqipërisë, por mbi të gjitha të Kosovës. Unë jam krenar që zemra e shqiptarit rreh fort për Shqipërinë për të mbrojtur shqiptarët brenda kufirit tonë por edhe shqiptarët në të gjitha në të gjitha trojet shqiptare,” tha Belind Këlliçi duke i bërë thirrje Edi Ramës:
“Vuçiçin mund ta kesh mikun tënd të zemrës, por në asnjë mënyrë nuk mund t’ua shesësh shqiptarëve për mikun e Shqipërisë. Ministrin e Millosheviçit nuk mund ta pranojnë shqiptarët për mik të Shqipërisë. Edi Rama, e vetmja masë që ke marrë sot është që ke hequr kërpudhën nga Kryeministria. Mos u shqetëso, nuk e ka kush me kërpudhën, e kemi me rrënjën e të keqes dhe korrupsionit në Shqipëri që ka një emër dhe quhet Edi Rama. Ne ty do të të heqim me rrënjë dhe themel nga qeveria, të cilën e ke përdorur vetëm për t’u pasuruar vetë dhe për të dëbuar shqiptarët nga vendi,” tha anëtari i Komisionit pë Rithemelimin e PD, Belind Këlliçi duke përfunduar:
“Ne jemi sot këtu sepse jemi pro-amerikanë, jemi pro BE!”
Ndërkohë që po zhvillohej protesta “Ballkani i Hapur” filloi takimin e radhës në Shqipëri me një darkë në Elbasan ku Kryeministri Edi Rama priti delegacionet e Presidentit të Serbisë, Aleksandër Vuçiç, Kryeministrit të Maqedonisë së Veriut, Zoran Zaev, dhe drejtuesin e Fondacionit “Open Society”, Alex Soros.
Dita e dytë e takimit, 21 Dhjetor, do të nisë në pallatin e Brigadave në orën 09:00, ku Kryeministri Edi Rama me Aleksandar Vuçiç dhe Zoran Zaev të shoqëruar nga disa ministra dhe krerët e Dhomave të Tregtisë ku do të nënshkruhet Marrëveshja e parë për kushtet dhe aksesin e lire në tregun punës. Më pas do të vijohet me marrëveshjet për skemat e përbashkëta për identifikimin elektronik të qytetarëve në pikat kufitare, për bashkëpunimin në fushën e sigurisë ushqimore, për njohjen e ndersjelltë për operatoret ekonomi.
Në ditën e dytë të punës, takimit do t’i bashkohet online dhe Komisioneri për zgjerim Oliver Varhely online, Drejtori i CEFTA-s, Emir Gjikiç, si dhe Sekretarja e Përgjithshme e Këshillit i Bashkëpunimit rajonal.
Takimi pritet të mbyllet me një konferencë për shtyp, të ideatorit të Open Balkan, Aleksandar Vuçiç dhe dy hyzmeqarëve të tij, Edi Rama dhe Zoran Zaev.
