Protestuan në Thirrë, arrestohen në Lezhë aktivistët e Lëvizjes Vetëvendosje
Pas një proteste në Thirrë kundër ndërtimit të hidrocentralit në këtë zonë, policia ka ndaluar dhe i ka shoqëruar për në Komisariatin e Lezhës disa aktivistë të Lëvizjes Vetëvendosje që mbështetën protestën e banorëve të Mirditës. Kandidati i pavarur për deputet në zgjedhjet e 25 Prillit, Ilaz Shehu, i cili mbështetet nga Lëvizja Vetëvendosje ka bërë thirrje që të lirohen aktivistët e kësaj Lëvizje ndërsa i bënë të qartë regjimit të Edi Ramës se kjo i bën edhe më të vendosur për ta vazhduar më tej atë që kanë nisur
”Mbas mbylljes së protestës, dhjetra kilometra larg vendit të protestës policia e shtetit i ka ndjekur aktivistët në mënyrë tinëzare, duke i ndaluar më tej dhe duke i shoqëruar për në Komisariatin e Lezhës. Ky pushtet nuk ka qenë kurrë më gabim se tani, kur krijon idenë se mund të na stepë me shoqërime dhe arrestime. Kjo ne na bën edhe më të vendosur për ta vazhduar më tej atë që kemi nisur,” është shprehur Ilaz Shehu duke i bërë thirrje policisë që të mos vendoset në funksion të qeverisë ku bëhet e ditur se policia ka shoqëruar 33persona, aktivistë dhe banorë të zonës.
”Nga ky pushtet nuk presim asgjë. Kurse Policisë së Shtetit i bëjmë thirrje që të mos vendoset në funksion të këtij pushteti. Lironi aktivistët menjëherë!”
Ndërkohë asambleisti i Lëvizjes Vetëvendosje në komunën e Prishtinës, Egzon Azemi, tha se në stacionin policor në Lezhë po mbahen së paku nëntë aktivistë të cilët sipas tij u arrestuan tinëzisht.
“Policia tentoi ta arrestoi edhe kandidatin për deputet Iliaz Shehu por ngatërruan makinat dhe nuk ia dolën dot. Lëvizja u ftua të marrë pjesë në këtë protestë nga banorët e zonës që kishin vetëm një kërkesë elementare njerëzore, ta mbrojnë ujin e pijshëm, që duan tua marrin.”
Ndryshe, dhjetëra qytetarë të Mirditës kanë protestuar sot, duke kundërshtuar ndërtimin e një HEC-i dhe fabrike uji në fshatrat Thirrë dhe Fan. Në Thirrë të Mirditës erdhën në mbështetje të protestës edhe qytetarë nga Kosova si dhe organizata të ndryshme, të cilat bënë thirrje për ndalimin e shkatërrimit të natyrës. Forca të shumta të policisë, kishin mbërritur para protestuesve për, siç u tha, parandalimin e përshkallëzimit të mundshëm, dhe përfundoi me konfrontim fizik me qytetarët.
