Protestuesit e arrestuar nga Edi Rama edhe në Fier i liron Gjykata

Katër pjesëmarrësit e protestës në Fier kundër kryeministrit Edi Rama u liruan.

Gjykata sot vendosi masën e sigurisë “detyrim paraqitje” për Behar Xhelon 56 vjeç, Besnik Jaupajn 56 vjeç, Gëzim Ballën 56 vjeç dhe Hysen Hoxhën 59 vjeç.

Prokurori kërkoi arrest me burg, ndërkohe gjykata ka dhënë masën e detyrim paraqitjes.

Seanca u zhvillua nën masa të rrepta sigurie nga Policia për shkak të frikës nga protesta e mundshme e mbështetësve të opozitës. Madje, Kryetari i PD në Fier, Luan Baçi tentoi të futet brenda rrethimit të gjykatës po nuk u lejua nga forcat e Policisë

Pjesëmarrësit e protestës së 9 marsit në Fier u arrestuan nga policia me akuzat e “Organizimit dhe pjesëmarrjes në grumbullime dhe manifestime të paligjshme” dhe “Pengim i qarkullimit të mjeteve të transportit”. Më 9 mars qytetarë dhe mbështetës të opozitës protestuan kundër vizitës së kryeministrit Edi Rama në qarkun e Fierit. Ata bllokuan rrugët ndërkohë Forcat e Ndërhyrjes së Shpejtë krijuan një situatë të tensionuar duke shkaktuar edhe përplasje. Gjatë këtyre çasteve të tensionit të shtunën u lëndua edhe një efektiv i FNSH.