Protestuesit përleshen me policinë në Paris

Protestuesit, të njohur si “Jelekët e Verdhë” janë përleshur sot me policinë franceze në afërsi të Harkut të Triumfit në Paris, ku kanë sulmuar disa dyqane.

Kjo është java e 18-të me radhë që qytetarët po protestojnë kundër presidentit të Francës, Emmanuel Macron.

Dhuna filloi kur protestuesit, pranë pallatit presidencial, hodhën në drejtim të policisë bomba tymi dhe objekte të tjera dhe filluan që të sulmojnë veturat e policisë, raporton RFE.

Polica përdori topa uji dhe gaz lotsjellës për të zmbrapsur protestuesit që u zhvendosën pranë Harkut të Triumfit.

Policia tha për Associated Press se deri në mesditë kanë arrestuar 44 persona.

“Jelekët e Verdhë” janë të zemëruar për rritjen e taksave dhe po kundërshtojnë politikat e presidentit Macron.