PS bojkoton Komisionin Hetimor, Alibeaj: Mazhoranca po pengon zbardhjen e masakrës zgjedhore!

Duke konfirmuar bojkotin nga Partia Socialiste të Komisionit Hetimor të zgjedhjeve të 25 prillit, Kryetari i këtij Komisioni Enkelejd Alibeaj thekson se kjo vërteton qartë qasjen që ka kjo mazhorancë duke penguar që e vërteta e masakrës zgjedhore të dalë në dritë.

Ndonëse mbledhja ishte caktuar me dakordësi nga opozita dhe PS, Alibeaj thotë se kjo e fundit nuk u paraqit në sallë me arsyetimin se sot ishte java e gjelbër e Kuvendit dhe kishin vendosur që ta bënin pushim.

“Siç jeni në dijeni në ditën e parë të mbledhjes së Komisionit kishim një debat për rregulloren. PS kërkoi kohë për t’u përgatitur, konsultuar për mbledhjen e sotme, me qëllim njohjen e rregullores dhe amendamenteve. Në bazë të ligjit mbledhjet thirren nga kryetari i komisionit. Duke vazhduar në vazhdën pozitive të mbledhjes së parë, në konsultim me Toni Gugun i kam komunikuar për mbledhjen e sotme, që do të ishte në datën 20 tetor, ora 15:00. Datë e cila u ra dakord herën e parë, e kërkuar dhe nga ata. Në sallën e byrosë u paraqitën anëtarët e opozitës.

U ndodhëm para një befasie të pakëndshme, bojkot nga anëtarët e maxhorancës. Nuk kishte asnjë arsye. Arsyeja ishte; “meqenëse jemi në javën e gjelbër të Kuvendit, sot po e marrim pushim dhe të caktojmë një datë tjetër”. Ne jemi këtu si detyrim i vendimit të Kuvendit për t’u mbledhur në një afat 3 mujor. Afati i këtij komisioni është 3 mujor. Sot është dita e 6 dhe nesër e 7, dhe duket fare qartë që mungesa e arsyes, justifikimeve, duket se është strategji e qartë për të penguar veprimtarinë e hetimit të masakrës zgjedhore të 25 prillit,” tha Enkelejd Alibeaj duke e bërë të qartë se nëse anëtarët e bojkotojnë përsëri Komisionin do të kërkohet zëvendësimi i tyre.

“Realisht ata që janë nën akuza jo vetëm prej nesh por edhe prej dokumentave ndërkombëtare. Mazhoranca është e dokumentuar si vjedhëse dhe shkatërruese dhe zgjedhjeve dhe ata do të bëjnë çdo gjë për të penguar këtë komision. Nuk më çudit kjo sjellje. Unë prisja që kjo të ndodhte që në mbledhjen e e parë. Duke parë edhe përgjërimet për dialog dhe shtrirje dore dhe çudia e madhe ndodh. Bojkot nga mazhoranca. Kjo tregon se cila është qasja e kësaj mazhorance që ka vjedhur votat dhe do të bëjë çdo gje për të penguar që e vërteta të dalë para shqiptarëve. Unë me kolegët e mi kemi vendosur të ndjekim të gjithë hapat që kushtetuta na lejon. Do të njoftomë kryetaren e Kuvendit, edhe Konferencën Kryetarëve. Jam i vendosur deri në fund që mungesat pa arsye këtë herë janë një shkak ligjor për të kërkuar zëvendësimin e tyre. T’ua bëjmë të ditur shqiptarëve se çfarë ka ndodhur me masakrën  e 25 prillit. Sot ata u demaskuan,” tha Kryetari i Komisionit Hetimor të zgjedhjeve të 25 prillit, Enkelejd Alibeaj, duke bërë të ditur se kur do të mbahet mbledhja e radhës:

“Po përfitoj t’ju njoftoj se mbledhja tjetër do të jetë të premten ora 10. Është ditë pune ku ne të kryejmë detyrimet ndaj Kushtetutës dhe nevojës së qytetarëve për të  hedhur  dritë mbi atë që ka ndodhur me 25 prill.”

Pas kësaj deklarate të Kryetarit të Komisionit Hetimor për zgjedhjet e 25 prillit, Enkelejd Alibeaj, reagoi Nënkryetari i Komisionit, Toni Gogu, duke pretenduar se në mirëbesim iu ishte propozuar kolegëve të opozitës që t’a vazhdonin mbledhjen ditën e enjte..