PS kërkon çregjistrimin, kandidati i koalicionit “Bashkë Fitojmë”: E kanë kot, do më kenë përballë më 14 maj në Shijak!
Pas kërkesës së Partisë Socialiste nga KQZ për çregjistrimin e kandidatit të koalicionit “Bashkë Fitojmë” për zgjedhjet lokale të 14 majit, në bashkinë e Shijakut, me akuzën se Rezeart Tusha rezulton i dëbuar nga Zvicra në vitin 1997, për posedim të lëndëve narkotike, duke iu ndaluar hyrja në Zvicër për pesë vite, ka reaguar vetë Tusha duke theksuar se nuk është se Qeverisë i intereson e vërteta, por se e dinë se çfarë i pret në Shijak në zgjedhjet e 14 majit!
“Siç mund ta keni parë, mediat pranë pushtetit, me porosi qeveritare, kanë nisur kundër meje një seri sulmesh bazuar në shpifje e shtrembërime. Kjo dëshmon se i ka kapur paniku për humbjen pritshme më 14 maj, dhe shpresojnë ta mundin Partinë Demokratike dhe kandidatin e saj në tavolinë. Përpjekja për të më skualifikuar mua si kandidat të koalicionit “Bashkë fitojmë”, nuk bëhet se u intereson e vërteta, por se e dinë se çfarë i pret në Shijak këto zgjedhje,” tha Tusha duke sqaruar opinionin publik në lidhje me atë që qeveria dhe mediat pranë saj quajnë “dënim” se KQZ e ka regjistruar për zgjedhjet e 14 majit, për arsye se e ka dorëzuar formularin përkatës ku deklaron se ka një kundravajtje në Zvicër, për shkelje të lejes së qendrimit dhe këtë e kishte deklaruar edhe në formularin për zgjedhjet e vititi 2021, kur ishte në listat e PD si kandidat për deputet dhe Prokuroria e Përgjithshme kishte kryer verifikim të thelluar, dhe duke kofirmuar të vërtetën me dokumentat e vënë në dispozicion për media përfundon:
Për shijakasit e mi kam vetëm një thirrje: mos u trembni! Bashkë fitojmë!
Ndryshe, duke kërkuar çregjistrimin e kandidatit të koalicioni “Bashkë Fitojmë” për kryetar të Bashkisë Shijak, Partia Socialiste në kërkesën e saj thekson se “më datë 4 Prill 2023 në shtypin e përditshëm është botuar shkrimi sipas të cilit “Kandidati i Sali Berishës për Bashkinë e Shijakut, Rezart Tusha, rezulton i dëbuar nga Zvicra në kuadrin e operacionit “Hydra” në vitin 1997, për posedim të lëndëve narkotike, duke iu ndaluar hyrja në Zvicër për pesë vite, një vepër penale kjo që sipas ligjit të dekriminalizimit të skualifikon nga gara për kryetar bashkie.”
Dhe, përveç shkrimit të shtypit që e ka shkruar me dorën e saj, Partia Socialiste thekson se kandidati nuk e ka deklaruar në formular një fakt të tillë, çka përbën vepër penale përveçse e skualifikon nga gara për qytetar të parë të kësaj bashkie.
Deklaratë:
Të nderuar bashkëqytetarë të Shijakut dhe rrethinave.
Të dashur vëllezër e motra shqiptarë!
Siç mund ta keni parë, mediat pranë pushtetit, me porosi qeveritare, kanë nisur kundër meje një seri sulmesh bazuar në shpifje e shtrembërime.
Së pari, kjo dëshmon se i ka kapur paniku për humbjen pritshme më 14 maj, dhe shpresojnë ta mundin Partinë Demokratike dhe kandidatin e saj në tavolinë. Përpjekja për të më skualifikuar mua si kandidat të koalicionit “Bashkë fitojmë”, nuk bëhet se u intereson e vërteta, por se e dinë se çfarë i pret në Shijak këto zgjedhje.
Së dyti, unë dua të sqaroj opinionin publik në lidhje me atë që qeveria dhe mediat pranë saj quajnë “dënim”.
Fakt ky që ndodhet vetëm në imagjinatën e tyre, jo në dokumente zyrtare.
KQZ më ka regjistruar për zgjedhjet e 14 majit, për arsye se e kam dorëzuar formularin përkatës ku deklaroj se kam një kundravajtje në Zvicër, për shkelje të lejes së qendrimit. Këtë e kam deklaruar edhe në formularin për zgjedhjet e vititi 2021, kur kam qenë në listat e Partisë Demokratike, si kandidat për deputet.
Në 2021, kur u ngrit ky pretendim për ‘dënim’, KQZ e çoi formalisht ne Prokurorinë e Përgjithshme për verifikim të thelluar nga sektori i dekriminalizimit dhe mora dritën jeshile të kandidimit.
Kjo është e vërteta me dokumente, të cilat do t’i vë në dispozicion të medias dhe publikut bashkë me këtë deklaratë.
Kjo është pjesë e luftës politike, përpjekje amorale e qeveisë për të më skualifikuar nga zgjedhjet. Nuk u vë faj, se u është bërë huq që, ose i vjedhin zgjedhjet, ose i fitojnë pa asnjë kundërshtar përballë.
E kanë kot. Do të më kenë përballë më 14 maj, jo vetëm si kandidat por edhe si gardian të votës së lirë.
Për shijakasit e mi kam vetëm një thirrje: mos u trembni! Bashkë fitojmë!
