PS nuk zbaton Vendimin e Kushtetueses, PD thirrje për SPAK: Moszbatimi, vepër penale!
Pasi Kryetari i Grupit Parlamentar të Partisë Socialiste, Bledi Çuçi e bëri të qartë se deputetët socialistë do të votojnë siç mendojnë dhe jo siç thotë vendimi i Gjykatës Kushtetuese, ka reaguar Partia Demokratike përmes kreut të Grupit Parlamentar, Gazment Bardhi duke theksuar se nëse mazhoranca ka vendosur të injorojë Kushtetutën, praktikisht jemi në diktaturë.
“Në emër të grupit të PD dënoj deklaratën e Bledi Çuçi se vendimet e Gjykatës Kushtetuese nuk janë detyruese për Kuvendin. Deklarata më e papërgjegjshme, sepse nëse mazhoranca ka vendosur të injorojë Kushtetutën , praktikisht jemi në diktaturë. Kjo deklaratë e thënë me lehtësi nga përfaqësuesi më i lartë i mazhorancës në Kuvend, e çon vendin në kushtet e mosbindjes civile.
Nëse secili nga ne e lë në vlerësimin e tij nëse duhet të zbatojë një vendim gjykate, këtu ka rënë i gjithë sistemi kushtetues,” tha kreu i Grupit Parlamentar të PD, Gazment Bardhi ndërsa kishte një thirrje për SPAK:
“Moszbatimi i vendimeve të Gjykatës Kushtetuese është vepër penale e konsumuar nga përfaqësuesit më të lartë të mazhorancës. Nuk mund të ketë drejtësi tjetër për opozitën e tjetër për mazhorancën.”
Ndryshe, kryetari i Grupit Parlamentar të Partisë Socialiste, Bledi Çuçi, duke fol për mandatin e Olta Xhaçkës, bëri të qartë se partia në pushtet nuk e ka diskutuar Vendimin e Gjykatës Kushtetuese por e ka shfuqizuar.
“Ka pasur një vendim të Gjykatës Kushtetuese që ka shfuqizuar 2 vendime të Kuvendit dhe Kuvendi pa dyshim nuk e diskuton vendimin por i shfuqizoi. Në rastin konkret ka një paqartësi mbi faktin nëse duhet që një deputet apo të gjithë duhet të votojnë në një formë të caktuar të detyruar nga një vendim jo nga ajo çfarë mendojnë. Ky është një debat që nuk ka gjetur zgjidhje as me vendimin e Gjykatës Kushtetuese.
Përkundrazi, Gjykata Kushtetuese në gjykimin tonë ka tentuar të krijojë një normë të re ligjore, që nuk ia lejon Kushtetuta. Thjeshtë duhet të gjykojë normat ekzistuese. Deputetët kanë të drejtë të votojnë siç mendojnë.”
