PS-PD dakord/ Reforma Zgjedhore n’fik, ngriten dy Komisione Hetimore sipas ligjit të Edi Ramës!
Pak më e mirë se marrëveshjet e pështira që arriti me deputetët e Gojores, sot partia e Edi Ramës arriti një dakordësi sërish të keqe që nesër pritet të shndërrohet në Vendim me deputetët e Foltores në Konferencën e Kryetarëve, duke iu lejuar ngritjen e dy nga tetë Komisionet Hetimore që kërkuan me një kleçkë që realisht rrënon veprimtarinë e tyre, ngritjen sipas ligjit të miratuar nga Partia Socialiste.
Ndërkohë për Reformën Zgjedhore, ndonëse në Konferencën e Kryetarëve u ra dakord për një Nënkomision për të gjitha Reformat, Kryetari i Grupit Parlamentar të PS në një dalje publike sapo mbaroi takimi e përjashtoi mundësinë që ai Nënkomision të merret për çështjen zgjedhore.
“Është lajm pozitiv që më në fund opozita u ul në Konferencën e Kryetarëve. Sot u duk sikur rivendosëm dialogun dhe bashkëbisedimin aty ku e lamë në tetor 2023. Sot vendosëm në Konferencën e Kryetarëve, që të rregullohen objektet për dy Komisionet Hetimore, që ata i propozuan vetë se cilët janë. Ishte frymë e mirë për vazhdimin e një jetë normale parlamentare në vend,” tha Kryetari i Grupit Parlamentar të PS, Blendi Çuçi, me sjellje shumë më harbute se me bedelët e Lulzim Bashës, duke hedhur poshtë mundësinë e ndikimit të Nënkomisionit për Reformat, në reformën zgjedhore:
“Unë besoj se ata janë të bindur se aksioni i tyre nuk i çon askund. Nuk ka asgjë për Reformën Zgjedhore. Zgjedhorja ka një Komision që funksionon. Komisioni Bipartizan po punon për të vendosur më të mirën për Reformën Zgjedhore.”
Ndryshe nga homologu i tij socialist, Kryetari i Grupit Parlamentar të PD Gazment Bardhi, ishte më entuziast pas Konferencës së Kryetarëve duke u shprehur se mazhoranca ka reflektuar ndërsa shtoi se çdo ligj që kërkon 3/5 pa përjashtuar ligjin për Reformën Zgjedhoren, do të diskutohet në një Nënkomision me partneritet të plotë të grupeve të PD dhe PS.
“Mazhoranca ka reflektuar pas 5 muajsh. U refuzua kërkesa e opozitës për ndryshimin e Kryetarit të Komisionit të Reformës Zgjedhore. Kemi rënë dakord në parim për ngritjen e Komisionit Hetimor për kontratat koncesionare korruptive në sektorin e shëndetësisë dhe për ngritjen e Komisionit Hetimor për ndërhyrjen në të dhënat personale në sistemin TIMS,” tha Gazment Bardhi duke përfunduar:
“Opozita ka pasur gjithmonë gatishmërinë për normalitet në parlament. Nënkomisioni do t’i duhet t’i japë Shqipërisë ligje, që janë në interes të shqiptarëve. Ne do të zbatojmë vetëm Kushtetutën.”
Ndryshe, nga tetori i vitit 2023 Partia Demokratike proteston në parlament duke kërkuar ngritjen e tetë komisioneve hetimore dhe postin e bashkëkryetarit të Komisionit të Reformës Zgjedhore, post i cili iu dhurua liderit të Gojores, Lulzim Basha, duke shpërfillur Rregulloren mbi funksionimin e parlamentit e cila është miratuar nga po kjo mazhorancë!
