PS vijon presionin ndaj prokurorisë/ Ja çfarë deklaroi Balla sot…

Kryetari i Grupit Parlamentar socialist Taulant Balla ka vijuar sot linjën e artikuluar një ditë më parë nga Kryeministri Edi Rama, sipas të cilit persona në kupolën drejtuese të PD janë të lidhur me 613 kg kokainë të kapur në Durrës.

Balla në një deklaratë zyrtare ndërsa ka marrë në mbrojtje ministrin e Brendshëm, Fatmir Xhafaj, tha se Lulzim Basha u fut në valle për një përgjim të stisur.

“Ne e dimë farë mirë që Bashën në këtë aventurë të rrezikshme është futur nga Sali Berisha për një arsye të thjeshtë, që ka të bëjë drogën, por që ka të bëjë me 613 kg e kokainës të fshehur nën banane.

Prisni e duroni ditët në vijim do të jenë të rëndësishme për lidhjet e personave të akuzuar për 613 kg kokaine me persona të rangjeve më të larta të PD. E gjithë kjo po e dëmton Shqipërinë në rrugën e rëndësishme të fazës përmbyllëse të hapjes së negociatave.

Kjo është dicka që nuk i bën mirë Shqipërisë megjithëse Basha pa e ditur është futur nga Berisha në një aventurë të rrezikshme”, tha Balla.

Duket se socialistët janë angazhuar totalisht në një presion të hapur ndaj prokurorisë, e cila po heton qoftë 613 kg kokainë, qoftë çështjen e përgjimit të Xhafajt.

Për të dyja çështjet, Kryeministri Edi Rama një ditë më parë dha konkluzionet e tij: përgjimi nuk është I vërtetë dhe se kupola e PD është e lidhur me kokainën.

Për rastin e parë Rama tha se përgjigjen e kishte marrë nga një laborator, emir I të cilit nuk dihet, ndërsa për lidhjet e kokainën tha se kishte informacione në rrugë operative.