Pse Ilir Meta mund ti dorëzohet Taulantit!

Pas dështimit të votimit të Ligjit të Magjistraturës në parlament, në mungesë të 84 votave të Rilindjes, kryetari i grupit parlamentar të Partisë Socialiste, Taulant Balla tha se po zhvillohen negociata zyrtare me LSI-në për të miratuar ndryshimet ligjore për Shkollën e Magjistraturës.

Lëvizja Socialiste për Integrim nxitoi të sqaronte opinionin se nuk është duke bërë kurrfarë negociate dhe se qëndrimi i tyre mbetet i pandryshuar.

Që qëndrimi i LSI mbetet i pandryshuar nuk e diskuton njeri, sepse ka ndryshuar vazhdimisht dhe nuk ka pse diskutohet qëndrimi i një partie që solli partinë e Taulant Ballës në pushtet. Por ti kthehemi karremit që hodhi Shërbëtori Taulant!

“Unë po ju them që kemi një komunikim zyrtar me LSI për këtë çështje, por dua të theksoj që e rëndësishme është që të ruajmë konsekuencën për qëndrimet tona për magjistraturën. LSI duhet të qëndrojë konsekuente si një vit më parë. Komunikimi nga LSI me individë? Shpresoj që në Kuvend ka deputetë me prirje evropiane që duan që reforma në drejtësi të vijojë”.

Përveç mesazhit për LSI, që Shërbëtori Taulant kishte plotësisht të drejtë, ai i dha edhe një mesazh të qartë  presidentit Ilir Meta nga i cili pritet dekretimi i Ligjit për pasurimin e Shkëlqim Fushës me shokë.

Njohësit e mirë të kulturës së Shërbëtorit Taulant e dinë se ai është gdhendur dhe shkolluar në Rumani, aty ku disa ditë më parë ranë edhe parimet e presidentit parimor Kalus Johanis. E kur ra Johanis, LSI përkatësisht Ilir Meta nuk ka pse diskutohet. Por Shërbëtori Taulant nuk e kishte vetëm me LSI-në përkatësisht Metën.

Reforma në Drejtësi përkatësisht zbatimi i saj në Rumani ishte lakuar shpesh nga politika shqiptare. Kryeprokurorja kundër Korrupsionit, Laura Kodruta Kovesi ishte bërë simbol i së drejtës rumune për hetimet dhe arrestimet që po bënte me zyrtarët dhe ish-zyrtarët e këtij vendi më të korruptuar në BE, dhe jo më kot përmendej edhe nga ekspertët evropian që shkëmbenin përvoja me ata shqiptarë. Por prokurorja Laura përveç se me arrestimet e zyrtarëve i dha të drejtë vetes që të jepte një mendim si eksperte edhe për Reformën Kushtetuese në kuadër të Reformës në Drejtësi e cila po kontestohej. Si një juriste me përvojë ajo normalisht që e kritikoi këtë lloj reforme, por më nuk ishte ajo Laura e hekurt sepse Qeveria socialdemokrate rumune nuk e gëlltiti dot këtë “goditje” dhe kërkoi shkarkimin e saj. Njohësit e rrethanave e dinë mirë se propozimi i qeverisë nuk kishte të bënte me këtë kritikë që bëri Laura Kodruta Kovesi, por ishte llogaridhënie për “mëkatet” e saj nga tronditja që i bëri klasës politike në Rumani e ku përfshihet edhe mazhoranca aktuale. Laura, e cila e kishte krijuar idenë se kishte mbështetjen e onm-rave rumune,  ngeli e vetmuar përkundër mbështetjes që mori nga Komisioni Evropian dhe Këshilli Evropian, që vlerësuan se me shkarkimin e Kryeprokurores mund të kërcënohet pavarësia e gjyqësorit.

Kështu pra, Shërbëtori Taulant nuk i ra nga Kina por nga Rumania!

Ilir Meta mund të mos dijë shumë gjëra, por atë që ndodhi në Rumani e ka shumë të qartë, se nëse asgjë tjetër është i mirinformuar se si u dorëzua presidenti rumun, Kalus Johanis

Kur Gjykata Kushtetuese e Rumanisë në fund të muajit maj urdhëroi heqjen e vetos në shkarkimin e prokurores me kërkesën e qeverisë, edhe pse opozita e kundërshtonte, askush nuk e mendonte se qeveria socialdemokrate kishte qëllim kriminal, por kështu ndodhi. Këtë qëllim ajo e jetësoi menjëherë dhe i dërgoi për dekretim presidentit Johanis, shkarkimin e Kryeprokurores kundër Korrupsionit, Laura Kodruta Kovesi. Presidenti Johanis ashtu si edhe kryetarja e LSI, Monika Kryemadhi nxitoi dhe tha një JO të madhe. Për dallim nga Mona, presidenti rumun Klaus Johanis njihej si njeri me parime, gjë që e bënin edhe prokuroren Laura të bëjë gjumë të qetë, por sociademokratët rumun në pushtet nuk e dorëzojnë lehtë pushtetin, pasi gjyqësorin tashmë e kanë në duar.

JO-së së presidentit Johanis iu përgjigjen me një propozim për shkarkimin e tij nga posti i presidentit. Në ditën kur në rend të ditës së mbledhjes së Qeverisë u fut shqyrtimi i shkarkimit të presidentit Johanis, Presidenca doli me një komunikatë duke bërë të ditur se “Presidenti rumun sot ka dekretuar shkarkimin e Laura Kodruta Kovesi”.

Sot, nuk diskutohet nëse do të kaloj Ligji i Magjistraturës sepse është çështje të cilën e mbyll Ilir Meta me bekimin ose kërcënimin e e efendikos së Shërbëtorit Taulant, pak rëndësi ka;  Por ky i fundit, me mesazhin e tij i bëri të qartë atyre që kundërshtojnë shembjen e Teatrit Kombëtar, se Likja kishte të drejtë kur kundërshtonte ndryshimet Kushtetuese në vitin 2008.

Sot është vonë edhe për ata që mendojnë se Ilir Meta është më parimor se Klaus Johanis sepse askush nuk e vë në dyshim kush është kryetar i LSI-së!

Dhe në fund, sot është vonë edhe për ndërkombëtarët që menduan se bënë hatanë me Reformën në Drejtësi në Shqipëri. Fundi në Rumani i Kryeprokurores së kundër Korrupsionit, Laura Kodruta Kovesi i jep një mesazh të qartë ndërkombëtarëve dhe jo vetëm, përmes mesazhit të shefit të Grupit Parlamentar të PS, se një SPAK jo vetëm që mund të ndalohet por ai as që do të prekë zyrtarët dhe miqtë e efendikos së Shërbëtorit Taulant!

Për qytetarët shqiptarë gjithçka ishte e qartë me kohë. Ata kurrë nuk përfituan asgjë nga asnjë ndryshim kushtetuese, që nga viti 1939…