Pse Ilir Meta vazhdon të jetë kryeministër?!
Reagon ashpër kur i thonë hajdut dhe nuk e ka për asgjë që është shefi i hajdutëve. Nga viti 2013 drejton një qeveri përplot me hajdut, që menaxhuan skandalet më të mëdha në historinë e pluralizmit shqiptar, si me PPP ashtu edhe pa to. Heshti kur mushkonja doli avionë me drogë, kur check-up Beqjes si shpikja shqiptare e shekullit doli kontroll i asgjëje që vetëm vjedhë, kur Saimiri si ministri më i suksesshëm doli trafikant ndërkombëtar i drogës, kur Mimi si përparimtarja e madhe e ushtrisë shqiptare na doli dezhurni e trafikantëve të drogës tek radarët, kur Dhimitri i Kotzias që na e ndriti diplomacisë shqiptare kishte mprehë lapsin për të vënë firmën mbi marrëveshjen me Greqinë, pa autorizim presidencial dhe kur Yaris përplotë me para, nga zgërdhirja doli faqja e zezë e kësaj qeverie. Që kjo hajdutëri qeveritare të jetë edhe më absurde, nuk duhet harruar faktin se të gjitha janë denoncuar nga opozita, dhe që për të gjitha rastet, Edi Rama doli në mbrojtje.
Por rasti i fundit me Yaris nuk është thjeshtë vetëm një makinë përplotë me para droge që tenton të futet në Shqipërinë e PPP-ve, në këtë parajsë fiskale për të cilën janë të shqetësuara të gjitha institucionet ndërkombëtare duke përfshirë këtu edhe DASH.
Shkronjës që zgërdhihet
Sipas fjalorit të gjuhës shqipe , ZGËRDHI/HEM – Qesh zakonisht pa vend e pa shkak, duke shtrembëruar fytyrën e duke nxjerrë dhëmbët jashtë, për të vënë në lojë dikë a për të shfaqur mospërfillje ndaj dikujt; zbardhë dhëmbët. Ç’ke që zgërdhihesh? Mos u zgërdhi ashtu?
Kjo sjellje, për të gjitha rastet e denoncimit nga opozita kishte pikërisht këtë përgjigje, dhe po të kthehemi në kohë, e tillë ishte sjellja edhe kur ishte kryetar bashkie dhe për kryeministër kishte Ilir Metën. Në atë kohë shquhej si shkronjës i fjalimeve të Ilir Metës, por i tillë mbeti edhe pas ikjes së Metës nga froni zyrtar dhe procesi i shkatërrimit të Fatos Nanos.
Asnjë vepër nga kthimi i tij si refugjatë, nuk mban firmën e tij, madje as për Lali Erin në krye të bashkisë së Tiranës, me të cilin krenohet, nuk mban ekskluzivitetin e Edi Ramës. Të gjitha krimet e tij kanë në krah shefin e tij të padiskutueshëm, njeriun që e bëri kryetar bashkie të Tiranës, kryetar të PS dhe së fundi edhe kryeministër. Sot quhet president, por mbeti me nofkën kryeministër sikur Tarasi deri në frymën e tij të fundit. Po, fjala është për Ilir Metën, për të cilin të gjithë miqtë e tij vazhdimisht e theksonin se vdes të bëhet kryeministër. Injorancë e gjallë. Ai i tillë ishte edhe në krah të Pandeli Majkos si zëvendës dhe i tillë mbeti kur mori vetë frenat në dorë, në përpjekje për ta bërë një partiak Parlamentin Shqiptar.
Të gjithë e kujtojnë luftën me kioskat, edhe pse pa kurrfarë lloj kontributi në këtë aksion, Edi Ramës ju faturua pastrimi i Parkut Rinia ndërkohë që në Bashkinë e Tiranës nuk kishte nën mbikëqyrje as një kaçavidë e lëre më fadroma, kamionë dhe policë pa fund që asistonin në realizimin e këtij projekti. Mjafton të kujtojmë rastin kur Mithat Havari u fut me fadromë në kafenë e të bijës së Enver Hoxhës; Rama tha se nuk ishte në dijeni për këtë ndërhyrje ndonëse aksioni për rrëzimin e ndërtimeve pa leje me firmën e tij kishte filluar nga Ura e Lanës dhe do të përfundonte tek Sheshi Willson. Ndërkohë që e bija e Tarasit ngeli duke tundur para mediave lejen e vërtetë që kishte të ndërtimit, Ilir Meta kryeministër u mjaftua me mesazhin që u përçua në popull duke i dhënë urdhër Edi Ramës të zgërdhihet.
Zgjedhjet më të turpshme shqiptare të vitit 2001, të cilat në fushatën parazgjedhore për moderator kishin Edi Ramën, kujtohen vetëm për gërthitjet e kryebashkiakut “O Doktooooooooor” dhe vjedhjeve spektakolare të votave. Ku, kryeministër ishte Ilir Meta. Kur kryetari i opozitës i denonconte këto vjedhje, ai vetëm zgërdhihej ndërsa presioni ndërkombëtar bëri që shefi i Edi Ramës të bëjë vetëm një hap mbrapa.
“Braktisja” e PS nga Ilir Meta nuk mund të imagjinohej nga askush, në veçanti nga zonja e parë, Monika e cila me duart e saj anëtarësoi çdo anëtar të FRESSH-it ashtu siç kishte bërë shoqja Nexhmije me Byronë Politike. Për ta bërë sa më të besueshëm këtë realitet u kujdes shkronjësi i fjalimeve dhe zgërdhaçi dezhurn i Ilirit i cili për shumë pak kohë do të dëshmojë se kush është jo vetëm kryetari real i PS por edhe kryeministër.
Fatos Nano kryeministër kaloi me kompromise publike për shërbim korrekt ndaj atyre që i shërbejnë, por në fakt ishte një dorë e fortë që solli një qeveri me njerëzit më besnikë të Ilir Metës, besnikëri e cila u shit si disiplinë partiake që nga koha e PPSH. Por janë shumë pak njerëz që e njohin funksionimin e kësaj qeverie të kenë besuar se kushinetat socialiste ishin të vajisura, po aq sa beson Fatos Nano se ishte Sali Berisha që e arrestoi.
Këtë e dëshmoi edhe vetë Edi Rama kur u ngrit Komisioni parlamentar për hetimin e vjedhjeve të kryetarit të bashkisë së Tiranës. Përveç Edi Ramës, askush nuk e çonte nëpër mend se ai mund të arrestohej pavarësisht zhvillimeve në këtë Komision. Por fundi i tij i tregoi edhe Ramës se kush është dirigjenti i këtij vendi, pavarësisht se kush e mban batonin në dorë (shkopi i dirigjentit ang).
Dhe vjen në shrehje teoria e besnikëve të Ilir Metës se “vdes të bëhet kryeministër”. Me Doktorin aleatë nuk arriti të zyrtarizohet më shumë se Zv/kryeministër, por pushtetin që gëzoi Ilir Meta dhe bizneset e tij nuk kishin nevojë për më shumë dorë. Problem i vetëm mbeten gjykatat ose besnikët e Ilirit që menaxhonin ato. Edi Rama si shkronjës dhe papagall i shquar i shefit vazhdoi llomotitjen për “gjykatat e Saliut” dhe nëse asgjë tjetër nuk bëri si kryetar i PS, arriti të bindë elektoratin e tij dhe jo vetëm, se Gjykatat e Shqipërisë janë në duart e Saliut. Këtë madje e betonoi edhe në rastin kur u krijua ideja se shefi i tij, Meta u lirua me ngjalat e Doktorit.
Acarimi me 21 Janarin tregoi se kush është Ilir Meta. Deri sa Doktori akuzonte prokuroren ishte Meta ai i cili akuzonte PS-n dhe kokë palarët e saj; Por, kjo nuk do ti pengojë që me ndihmën e Presidentit të Serbisë, Boris Tadiç ai ta kurorëzonte rikthimin e tij në familjen socialiste me fitoren ndaj Doktorit. Kjo aleancë përveç pushtetit legjitimoi edhe zgërdhirjen e fituesve në luftën kundër Berisha-Nanos.
Drogë dhe Para
Kryeministri Edi Rama me ose pa tepsi do të mbahet mend në qeverisje me Ilir Metën, vetëm me zgërdhirjen e tij. Për të gjitha skandalet që ndodhën gjatë kësaj qeverisje ai fajësoi tepsinë, por nuk ka njeri që u përgjigjë për futjen antiligjore të turinjve në këtë tepsi. Nga ana tjetër për drogën e mbjellë dhe akuzat e përditshme të opozitës zgërdhirja filloi të bëhej malinje ndërsa menaxheri i kësaj tregtie shumë fitimprurëse të dekorohet deri me vizitën në Shtëpinë e Bardhë.
Aty ku ishte Saimiri ishte droga, dhe aty ku ishte droga ishte paraja, e shumë pak rëndësi kishte se kush është kryeministër i një qeverie kryekëput hajdutësh. E rëndësishme ishte që aty ku ishte Ilir Meta të mos ketë pranga!
Vetëm me ikjen e Metës nga qeveria, u legjitimua Saimiri si trafikant. Pse?! Kjo nuk do shumë shkencë ashtu siç nuk duhet shumë mend për të kuptuar se si mund të jetë një njeri aq i pacipë për të qenë kryeministër i një qeverie me ministra, Beqjen, Haxhinaston, Ahmetin, Kokën, Mimin e Gjiknurin.
Këto janë edhe arsyet që zgërdhirjen në seancën plenare të së enjtes, pas denoncimit të kryetarit të PD, Lulzim Basha për një makinë të kapur të tipit Toyota Yaris përplotë me para në portin e Durrësit, e bëjnë më shumë reale se sa aktrim. Edi Rama di të zgërdhihet por nuk e ka ditur dhe nuk e di se sa para mund të vjedhin ministrat e tij, ashtu siç nuk mund ta dijë se sa para mund të futen me ose pa Yaris.
Edi Rama e di që nuk është ai i cili e bëri i dhe mund ta bëjë Erjon Velinë kryetar të bashkisë së Tiranës, dhe vazhdon të mos e ketë të qartë pse i lejohet që me raste të përvetësoj gjithë këto merita. Kur të gjithë ata që kanë nevojë për lejet e ndërtimit për asnjë çast nuk kanë ngatërruar të zotin e punës.
Edi Rama kontribuoi edhe në krijimin e opinionit më të tmerrshëm që mund të pjellë koka shqiptare, por nuk e di se si mund të degdiset Ilir Meta duke u bërë President.
Por, sot, “i degdisuri” mund të bëjë gjumë qetë, sepse është vetëm ai i cili e di pse vazhdon të jetë kryeministër!
