Pse qeveria e fsheh informacionin për Covid-19?!

nga Prof.Assoc.Dr.Gazment Koduzi

Në një nga vargjet e Biblës thuhet: The truth will set you free (E vërteta do t’ju çlirojë).

Prej fillimit të pandemisë së Covid-19, Qeveria dhe Kryeministri i Shqipërisë, nuk kanë bërë tjetër gjë veçse kanë fshehur të vërtetën. Madje këtë proces të fshehjes të së vërtetës z.Rama e ka bërë pikërisht duke cituar një ditë Biblën e një ditë Kuranin.

Dihet se në situatë të vështira, kur kërkohen sakrifica nga gjithsecili, vetëm e vërteta i udhëheq qytetarët drejt bashkimit dhe përballimit të saj. Ndërkohë, fshehja e të vërtetës dhe mistikja, ngjall frikë, duke mos ngjallur sinergji në komunitet por strukje individuale. Por krejt në të kundërt të kësaj, dhe gjithë sjelljes së liderëve botërorë, që kanë ftuar për qetësi dhe bashkëpunim, z. Rama ka zgjedhur të përdorë si strategji frikësimin e përditshëm të popullatës.

Që në fillim popullatës ju mbajt i fshehtë momenti kur janë shfaqur rastet e para me covid-19 për qëllime politike, sepse duhej mbajtur kongresi i PS si edhe mungesa e përgatitjes së sistemit shëndetësor për t’u përballur me pasojat e infeksionit në popullatë. Nga ana tjetër, qytetarëve iu është kërkuar sakrificë deri në humbjen e aktiviteteve dhe investimeve dhjetravjeçare, nën argumentin se ashtu ka vendosur Komiteti Teknik i Ekspertëve, edhe pse ka qenë thuajse zero informacioni mbi përbërjen e këtij organizmi.

Vendimmarrjet më të rëndësishme për jetët dhe ekonominë e shqiptarëve sot, merren nga një organizëm anonim, ku në fotot e tij në krye ndodhet Ministri i Shëndetësisë, që është thjesht aty në një post politik por jo se ka ndonjë lidhje me menaxhimin shëndetësor në CV.

Atëherë, vendimet e cilëve ekspertë duhet të zbatojnë shqiptarët?

Leximi i përditshëm i të dhënave minimale për situatën e covid-19 në vend, janë një shfaqje e turpshme e institucioneve që nuk kanë çfarë tu thonë shqiptarëve, përmeç propagandës. Madje as gazetarët nuk duket se kanë ndonjë mundësi që të bëjnë hetimet dhe pyetjet elementare: si përcaktohet rasti, cfarë definicioni përdorin për “vdekjet” me covid-19, sa kite ka blerë qeveria me taksat e shqiptarëve për shëndetin e tyre, etj.

Nuk dua të sjell për shembull konferencat për shtyp të Presidentit Trump, por të paktën të organizohet konferencë për shtyp njëherë në javë nga Komiteti Ekspertëve, njësoj si ai i Istituto Superiore di Sanita (Instituti Superior i Shendetit) në Itali, me prezencën e gazetarëve. Ndërkohë që tek ne, Ministria dhe Instituti i Shëndetit Publik, jo vetëm që nuk organizojnë konferenca shtypi të tilla me pyetje, por ato nuk zbatojnë as ligjet vendase për të drejtën e informimit.

Personalisht, i jam drejtuar Institutit të Shëndetit Publik që në 23 Mars 2020 me kërkesë informacioni në lidhje me gjendjen e kiteve, tamponeve, raportin analiza / persona të dyshuar, dhe nuk kam marrë asnjë info deri më sot, edhe pse ka kaluar një muaj.

Nga përvoja në menaxhimin shëndetësor mendoj që fshehja e informacionit është strategji në funksion të axhendës politike të Ramës, e cila i mundëson të bëj demagogji dhe mbaj në këmbë pushtetin e tij. Ky dyshim përforcohet edhe me vendimin e sotëm për shtyerjen e gjendjes së fatkeqësisë natyrore deri në 23 Qershor ( dy muaj të tjerë) pa asnjë argument dhe strategji dalje nga kjo gjendje.

Nëse qeveria dhe ministria theksojnë që kemi qenë të suksesshëm në ndërhyrjet tona, dhe në Tiranë dje nuk ka patur asnjë të infektuar, atëherë përse shtyhet gjendja e fatkeqësisë?

Karantina është koncept izolimi për për të infektuarit, dhe qeveria në vend që të rrisë numrin e testimeve, të identifikojë dhe karantinojë të infektuarit, dhe të shëndetshmit të vazhdojnë jetën sociale dhe ekonomike lirshëm, izolon gjithë popullatën?

Fatkeqësisht, ndoshta edhe me qëllim për të fshehur të vërtetat e sotme dhe mungesën e strategjive, z.Rama ka përdorur dhe po e përdor terrin informative për të eliminuar edhe ato pak liri dhe të drejta të individit, të cilat tashmë edhe i ka pezulluar në mënyrë krejt të fshehtë nga tërheqja e Konventave Evropiane e të Drejtave të Njeriut, ashtu siç bën edhe tenderat e tij. Për të mos përmendur edhe ndalimin më thelbësor për të drejtën e besimit, ashtu siç ndodhi me moslejimin e festave të Pashkëve në kisha apo faljen e muslimanëve në xhamia, duke respektuar distancimin fizik.

I vetmi plan i z. Rama është pushteti. Për këtë ai nuk kursen asnjë frikësim, asnjë propagandë, ndërkohë që shëndeti dhe ekonomia e shqiptarëve duken edhe I fundit shqetësim I tij. Të paktën, për aq kohë sa gënjen publikusht, askush nuk duhet të besojë se ai e ka seriozisht.