Publikimi i listës së rrogave, Këlliçi: Terror psikologjik, shteti të njeh me rrënjë e dhëmballë

Pas publikimit të databazës me të dhënat e qytetarëve të punësuar në sektorin privat dhe publik, pozicionin e tyre të punës, numrin e ID-së, NIPT-it dhe pagës bruto të deklaruar të 637.138 tatimpaguesve, ka reaguar anëtari i Komisionit të Rithemelimit të PD, deputeti Belind Këlliçi, duke e konsideruar si përpjekje për të krijuar një klimë terrori psikologjik se shteti të njeh me rrënjë e dhëmballë.

“Dinë kë ke votuar, kë mund të votosh, nga do anosh; të gjurmojnë votën, dinë ku punon dhe sa e ke rrogën. Tatimet, QKR, e-Albania, Shqipëria që duam, të gjitha në funksion të patronazhimit socialist. Përdorin të dhënat personale për të krijuar klimën e terrorit psikologjik se shteti të njeh me rrënjë e dhëmballë,” thekson Belind Këlliçi duke e cilësuar si mendësi të njëjt kontrolluese diktatoriale nga ai që do hapi Ballkanin me koka peshku.

“Si qëmoti edhe tani, e njëjta mendësi kontrolluese diktatoriale. Pikërisht nga ai që do hapi Ballkanin me koka peshku. Si një pijanik tavolinash të fryra, që pasi i vishen sytë nga avujt e alkoolit, ia nis të diskutojë me pathos edhe për gjeopolitikën,” shkruan Këlliçi.