Publikohet logoja e 25 vjetorit të çlirimit, Kryeministri Kurti: E frymëzuar nga historia!
Kryeministri i Kosovës, Albin Kurti duke publikuar logon e 25 vjetorit të çlirimit të Kosovës thekson se ajo është e frymëzuar nga historia dhe kultura, motivet e ngjyrat e qëndisura në veshjet tradicionale
“Frymëzuar nga historia dhe kultura, motivet e ngjyrat që i gjejmë të qëndisura në veshjet tradicionale e të thurura në artizanatet tona, na vijnë të rifreskuara me dizajn modern,” shprehet Albin Kurti përmes rrjetit social Facebook duke përfunduar:
“Aty shohim profilin e pëllumbit të bardhë që simbolizon paqen e lirinë, si dhe simbolin e shqiponjës dykrenare e vigjilente, që është e ngulitur thellë në historinë e identitetin tonë kombëtar.”
Ndryshe, Ministria e Kulturës një ditë më parë ka publikuar logon dhe ka shpalosur agjendën shtetërore për shënimin e 25-vjetorit të Çlirimit të Kosovës.
Në 12 Qershorin e vitit 1999, forcat e NATO-s së bashku me UÇK-në shkelën në tokën kosovare duke sjellë lirinë, çlirimin dhe paqen, që njihet edhe si Dita e Çlirimit të Kosovës.
