Pulë me kokainë nga Brazili, arrestohet Këshilltari i Erion Veliajt

Edhe një Zyrtar i Partisë Socialiste përfundon në pranga për trafik kokaine. Fjala është për anëtarin e Këshillit Bashkiak të Tiranës, Egert Vargu, i cili me finalizimin e operacionit “Tranziti”, mbrëmjen e së mërkurës ku u sekuestruan 45.5 kg kokainë në një kontenier me mish pule në Portin e Durrësit, u arrestua si agjent doganor i kontraktuar nga kompania “Apetit Group” së bashku me Arben Ferizin nga Prishtina, si administrator i kompanisë që kishte porositur ngarkesën e mishit të pulës në Brazil.

Në faqen zyrtare të Bashkisë së Tiranës, Egert Vargu, pjesë e trafikut të 45.5 kg kokainë të kapur në Durrës, mbështjellë me figurën e filmit të animuar “Goku”, rezulton dhe anëtar i Komisionit të Financës dhe Buxhetit në Bashkinë e Tiranës.

Egert Vargu, në profilin e tij në Facebook ka postuar një foto të Agjencisë Doganore “AG Shpk”, e cila është në emrin e bashkëshortes së tij.

Ndryshe, si rezultat i kontrollit të imtësishëm të ushtruar në një kontenier të ngarkuar me mish pule, që ishte nisur tranzit nga Brazili, për llogari të një subjekti tregtar në Maqedoninë e Veriut, në brendësi të ngarkesës me mish pule u gjetën 40 pako me lëndë të dyshuar narkotike kokainë, me peshë 45 kg e 500 gramë.