Punime në aksin Vorë -Fushë Krujë. Ja si devijohet trafiku për 45 ditë

Nesër fillojnë punimet për rehabilitimin e aksit rrugor Vorë -Kthesa Rinas- Fushë Krujë. Në njoftimin e Autoriteti Rrugor Shqiptar sqaron se do të bllokohet kalimi nga kthesa e Doganës deri tek kthesa për Prezë ndërsa Dogana e Tiranes do të jetë e aksesueshme nga ana e Vorës.

Devijimi i trafikut, i cili do të bëhet për 45 ditë sa do të zgjasin punimet, do të sqaroeht me sinjalistikën provizore të vendosur në segmentin ku do të punohet si dhe udhëzimet e policisë.

Njoftimi

Autoriteti Rrugor Shqiptar dhe Policia e Qarkullimit Rrugor informojnë median dhe opinionin publik se duke nisur nga dita e enjte (datë 13 Shtator 2018), në kuadër të projektit të mirëmbajtjes me performancë të Bankës Botërore, do të fillojnë punimet për rehabilitimin e aksit Vorë-Kthesa Rinas-Fushë Krujë.

Punimet kryesore të cilat janë parashikuar gjatë fazës së rehabilitimit të këtij aksi rrugor janë prishja e shtresave ekzistuese asfaltike; zëvendësimi i nënshtresave në çakëll dhe stabilizant; realizimi i të gjitha shtresave të reja asfaltike në të gjithë gjatësinë e rrugës dhe vendosja e sinjalistikës rrugore dhe e masave të sigurisë rrugore.

Nga dita e neserme do të bëhet bllokimi i aksit nga Kthesa e Doganës së Tiranës deri tek kthesa për Prezë.

Kohëzgjatja e punimeve për rehabilitimin e segmentit nga Kthesa e Doganës së Tiranës deri tek kthesa për Prezë është 45 ditë.