Pushteti i Erion Veliajt, zëvendësohen 4 Nënkryetarë të Bashkisë Tiranë, por, jo edhe Lali Eri
Pas dorëheqjes së Frida Pashakos, Keti Luarasit, Andi Seferit dhe Jonida Halilit, Bashkia Tiranë ka zyrtarizuar sot emërimin e katër nënkryetarëve të rinj, por, për postin e Kryetarit Erion Veliaj, as që bëhet fjalë ndonëse janë mbyllur akuzat dhe mbi të rëndojnë akuza shumë të rënda.
Kështu, Ilir Mëngra do jetë Nënkryetar për punët publike, Vasilika Vjero, Nënkryetare për financat dhe zhvillimin ekonomik, Blendi Sulaj, Nënkryetar për territorin dhe menaxhimin e zhvillimit rural, dhe, Gentian Keri, Nënkryetar për administratën e Bashkisë.
Ndonëse emërimet u tha se janë bërë nëpërmjet një procesi seleksionimi, ku kriteri kryesor ka qenë vlerësimi mbi bazë të meritokracisë, me synimin për të rritur efektivitetin në qeverisjen vendore, në këtë Bashki ishin dhe mbeten fjalë të panjohura si seleksionimi, meritokracia dhe efektiviteti, aq më shumë kur Kryetare e komanduar e Bashkisë Tiranë nga Edi Rama vazhdon të jetë, Anuela Ristani, dhe Erion Veliaj nuk guxon askush as ta zë në gojë.
Ndryshe, Anuela Ristani do të vijojë të ushtrojë funksionet e Kryetrait Bashkisë Tiranë dhe të delegojë firmën e Erion Veliajt, i cili ndodhet në arrest që prej datës 10 shkurt 2025, pas urdhrit të lëshuar nga SPAK.
Ndërkohë katër Nënkryetarët e rinj vijnë nga postet e larta të shtetit të Edi Ramës:
Ilir Mëngra u emërua në krye të DPSHTRR duke zëvendësuar në detyrë Blendi Gonxhen, ndërsa më parë ka mbajtur postin e kreu të Drejtorisë rajonale të Transportit Rrugor në Tiranë.
Blendi Sulaj kandidoi për Partinë Socialiste në zgjedhjet e 11 Majit në Qarkun Tiranë. Para se t’i bashkohej PS-së, ai drejtoi Degën e PD të Njësisë 9 në Tiranë në kohën kur e drejtonte Lulzim Basha pas ngjarjeve të zgjedhjeve 2021, si dhe ka mbajtur postin e Nënkryetarit të Partisë Republikane.
Gentian Këri ka mbajtur detyrën e ish-kryetarit të Komisionit të Prokurimeve Publike.
Dhe, ish-zv/ministrja e Financave, Vasilika Vjero, prej datës 3 Shkurt 2025 ishte emëruar këshilltare e Ministrit të Financave. Përpara se të emërohej zv/ministre, ajo ka qenë Drejtore e Përgjithshme e Tatimeve.
