Putin: Administratë ndërkombëtare në Ukrainë! Shtëpia e Bardhë: Qeverisja përcaktohet me Kushtetutë
Pas sugjerimit të Presidentit rus, Vladimir Putin, se Ukraina mund të vendoset nën një formë të një administrate të përkohshme ndërkombëtare, me qëllim që të mundësohet mbajtja e zgjedhjeve në Ukrainë dhe nënshkrimi i marrëveshjeve të rëndësishme, ka reaguar Shtëpia e Bardhë duke e hedhur poshtë këtë propozim!
Qëllimi afatgjatë i një administrate të tillë do të ishte arritja e një marrëveshjeje për t’i dhënë fund luftës, tha Putin gjatë një vizite që i bëri sot Flotës Veriore në Murmansk.
“Kjo ide mund të zbatohet nën mbikëqyrjen e Kombeve të Bashkuara, Shteteve të Bashkuara me shtetet evropiane dhe me partnerët dhe miqtë e Rusisë. Qëllimi do të ishte që “të mbaheshin zgjedhje demokratike dhe të vinte në pushtet një qeveri që gëzon besimin e njerëzve dhe më pas të nisnin bisedimet me të për një traktat të paqes”, tha Putin dhe ndonëse e theksoi se ky është vetëm një nga opsionet dhe nuk është se nuk ka të tjera, këtë opsion Shtëpia e Bardhë e hodhi menjëherë poshtë.
Një zëdhënës i Këshillit të Sigurisë Kombëtare të Shtëpisë së Bardhë hodhi poshtë kërkesën e liderit të Kremlinit dhe tha se qeverisja në Ukrainë përcaktohet nga kushtetuta dhe populli i vendit.
Kjo vjen pasi Volodymyr Zelensky tha se SHBA po ndryshon vazhdimisht kushtet e një marrëveshjeje kryesore për mineralet si pjesë e marrëveshjes së paqes, duke shprehur zhgënjimin për mungesën e një marrëveshjeje përfundimtare mbi marrëveshjen e Ukrainës për tokat e rralla, të vendosur nga Washingtoni.
Më herët, Emmanuel Macron njoftoi se një delegacion ushtarak britaniko-francez do të dërgohet në Ukrainë për të vëzhguar nevojat e Kievit dhe çfarë mund të bëhet për të mbështetur ushtrinë e tij dhe se trupat do të vendosen si një forcë sigurie për të mbështetur çdo marrëveshje të mundshme paqeje të rënë dakord me Rusinë.
Ndryshe, Zgjedhjet në Ukrainë duhej të mbaheshin në maj të vitit 2024, por votimet nuk mund të mbahen derisa të jetë në fuqi gjendja e luftës, e cila në Ukrainë është në fuqi që kur Rusia nisi pushtimin e shtetit fqinj në shkurt të vitit 2022. Sipas Kushtetutës së Ukrainës, Zelenskyy do të vazhdon të jetë president derisa të mbahen zgjedhjet e reja.
Ndërkohë E Putin përsëriti qëndrimin e tij se udhëheqja aktuale e Ukrainës është jolegjitime, dhe për këtë arsye heziton që të nënshkruajë ndonjë dokument me të. Presidenti rus shprehu dhe gatishmërinë e Rusisë për një marrëveshje paqësore dhe se beson që presidenti amerikan, Donald Trump, sinqerisht dëshiron që t’i japë fund konfliktit dhe këtë e dëshmon edhe kërkesa e Trumpit për bisedime direkte mes negociatorëve të SHBA-së dhe atyre të Rusisë.
