Putin firmos dekretin për të rritur numrin e forcave ushtarake ruse

Presidenti i Rusisë, Vladimir Putin sot firmosi një dekret për të rritur numrin e forcave të armatosura ruse në 2.390.758 nga 1.902.000 që janë aktualisht

Sipas dekretit, numri i personelit ushtarak do të rritet nga 1.013.628 në 1.150.628 efektivë.

Në dekret, raporton RFE, përmendet edhe personeli që do të punësohet nga radhët e civilëve për llogari të forcave të armatosura ruse. Dekreti do të hyjë në fuqi më 1 janar, 2023.

Dekreti vjen shtatë muaj pas pushtimit të paprovokuar të Ukrainës dhe mes raportimeve të pakonfirmuara për humbje të konsiderueshme të pësuara nga forcat e armatosura ruse gjatë këtij konflikti.

Më 29 maj, Presidenti Vladimir Putin firmosi një ligj që u mundëson personave mbi 40 vjeç të regjistrohen në forcat e armatosura. Më parë ushtria ruse kishte kufij moshe për rekrutimin e ushtarëve nga 18 deri në 40 vjeç.

Ekspertët ushtarakë ukrainas dhe perëndimorë thonë se Rusia ka pësuar humbje të mëdha në luftën që po zhvillohet në Ukrainë, raporton RFE. Edhe pse lideri rus, nuk i ka pranuar dhe i ka mohuar gjithmonë shifrat e publikuara sa i përket humbjeve të ushtrisë ruse gjatë kësaj periudhe, lëvizjet e tij tregojnë të kundërtën.