Putin: Koresë së Veriut i duhen garanci ndërkombëtare për sigurinë

Presidenti i Rusisë, Vladimir Putin, tha se Koresë së Veriut i duhen garanci ndërkombëtare për sigurinë përpara se t’i japë fund programit të saj bërthamor.

Putin i bëri komentet pas takimit të tij të parë me udhëheqësin koeranoverior, Kim Jong Un, pranë qytetit Vlladivostok në Lindjen e Largët të Rusisë.

Presdenti i Rusisë tha se garancitë e tilla do të duhen të ofrohen nga një kuadër shumëkombësh.

“Jemi të lumtur për rezultatin e bisedimeve – unë dhe kolegët e mi. Kryetari Kim Jong Un është një person mjaft i hapur dhe zhvilloi një bisedë të lirë për të gjitha çështjet në agjendën tonë”, tha Putin.

Kim nga ana e tij tha se Samiti ishte një shkëmbim shumë domethënës për çështje të interesit të përbashkët”.

Ndryshe, takimi Putin-Kim Jon Un u zhvillua dy muaj pas dështimit të bisedimeve midis Shteteve të Bashkuara dhe Koresë së Veriut për çarmatosjen bërthamore të Gadishullit Korean.

Kim Jong Un ka takuar Presidentin amerikan, Donald Trump, në muajin shkurt. Bisedimet dështuan pasi Shtetet e Bashkuara kanë refuzuar kërkesat e koreanoveriorëve për të hequr sanksionet ndaj shtetit të tyre, në këmbim të kufizimit të programit bërthamor.