Putin mesazh Vuçiçit: Moska e vlerëson politikën e ndjekur nga Beogradi

Presidenti rus Vladimir Putin ka uruar presidentin serb Aleksandar Vuçiç për Ditën e Shtetësisë së Serbisë që shënohet më 15 shkurt, me mesazhin se Moska “e vlerëson shumë politikën e jashtme të balancuar” të ndjekur nga Beogradi.

“Serbia është një partner i rëndësishëm dhe i besueshëm i Rusisë. Ne vlerësojmë shumë kursin e balancuar të politikës së jashtme që Beogradi zbaton në rrethanat aktuale komplekse ndërkombëtare”, tha Putin në një mesazh urimi dërguar Vuçiçit sot nga ambasadori rus Aleksandar Bocan Kharchenko duke shtuar se Rusia mbështet përpjekjet e Serbisë që synojnë mbrojtjen e integritetit territorial të vendit dhe zgjidhjen e çështjes së Kosovës.

Në letër, raporton RFE, presidenti rus shprehu besimin e tij se zhvillimi i mëtejshëm i partneritetit strategjik ruso-serb korrespondon plotësisht me interesat e kombeve vëllazërore.

Serbia është shteti i vetëm në Evropë që nuk vendosi sanksione ndaj Rusisë pas pushtimit të Ukrainës më 24 shkurt.

Në raportin e fundit të Parlamentit Evropian, thuhet se Serbia ka respektuar rezolutat përkatëse në Asamblenë e Përgjithshme të Kombeve të Bashkuara, por shprehet keqardhje për faktin se Serbia ka dështuar vazhdimisht të jetë në përputhje me masat kufizuese të BE-së kundër Rusisë.

Gjithashtu, raporton RFE, shprehet keqardhje për faktin se “komponentët kyç të politikës së jashtme serbe janë në kundërshtim të drejtpërdrejtë me qëndrimet e BE-së”.

Në këtë kuptim, raporti përmend nënshkrimin e marrëveshjeve që përcaktojnë prioritetet e përbashkëta të politikës së jashtme të Serbisë dhe Rusisë për periudhën 2023- 2024, si dhe takime me zyrtarë të rangut të lartë nga Rusia që janë në listën e sanksioneve të BE-së.