Putin negocion dhe vret, raketat ruse godasin qendrën e Harkivit
Sulmet ruse në qytetin Harkiv të Ukrainës dhe kryeqytetin Kiev vazhduan gjatë natës së 28 shkurtit dhe mëngjesit të 1 marsit. Mediat raportojnë për shpërthime të fuqishme në Harkiv, qytet i rëndësishëm për ukrainasit.
Përveç se qyteti i dytë më i madh në Ukrainë, dhe kryeqyteti i parë i Republikës Socialiste Sovjetike të Ukrainës, që ishte krijuar nga bolshevikët, në këtë qytet ka industri tejet të rëndësishme për Ukrainën, duke përfshirë fabrikën e tankeve, si dhe shumë kompani të teknologjisë informative.
Në Harkiv, ushtria ruse po hedh në erë nënstacione, tha kryebashkiaku i qytetit, Ihor Terekhov. Sulmet thuhet se po shkaktojnë probleme me furnizimin me energji elektrike dhe ujë.
Ndërkohë, trupat ruse thuhet se po përparonin drejt kryeqytetit.
Në këtë mëngjes, raketat kanë goditur Sheshin Liria, afër të cilit gjenden zyrat e administratës rajonale. Duke folur pas sulmit, udhëheqësi i administratës rajonale, Oleh Synehubov, e ka përshkruar situatën si “krim të pabesë lufte”.
“Situata mbetet e tensionuar,” reagoi përmes rrjetit social Faebook, Shtabi i Përgjithshëm i Ushtrisë së Ukrainës në Facebook.
Ndërsa Presidenti ukrainas, Volodymyr Zelensky, bombardimin e Harkivit, si pasojë e të cilit kanë vdekur dhjetëra persona e ka përshkruar si krim lufte.
“Forcat ruse kanë qëlluar britalisht Harkivin nga aeroplanët”, ka thënë Zelensky në mbrëmje, në një adresim para popullit ukrainas.
“Ky është krim lufte. Qyteti paqësor. Zona paqësore të banimit. Pa objekte ushtarake. Dhjetëra incizime të dëshmitarëve dëshmojnë se kjo nuk është vetëm breshëri e vetme, por shkatërrim i njerëzve. Rusët e kanë ditur kë kanë qëlluar”.
Vetëm dje, sulmet në Harkiv lanë të paktën 11 persona të vdekur dhe dhjetëra të plagosur, me 87 objekte banimi të shkatërruara.
Ministri i Jashtëm ukrainas, Dmytro Kuleba, ka publikuar një video në Twitter, që sipas tij shfaq momentin kur në Harkiv është sulmuar Sheshi Liria.
Ai ka akuzuar presidentin rus, Vladimir Putin për krime lufte dhe ka bërë thirrje që bota ta izolojë Rusinë.
Barbaric Russian missile strikes on the central Freedom Square and residential districts of Kharkiv. Putin is unable to break Ukraine down. He commits more war crimes out of fury, murders innocent civilians. The world can and must do more. INCREASE PRESSURE, ISOLATE RUSSIA FULLY! pic.twitter.com/tN4VHF1A9n
— Dmytro Kuleba (@DmytroKuleba) March 1, 2022
Ndërkohë zyrtarët ushtarakë ukrainas kanë pretenduar se 5.710 trupa ruse janë vrarë në pesë ditët e para të luftimeve në Ukrainë. Në një video-mesazh të publikuar në Facebook, një zëdhënës i Shtabit të Përgjithshëm tha se mbi 200 ushtarë rusë janë zënë nga forcat ukrainase.
“Janë shkatërruar 198 tanke ruse, 29 aeroplanë, 846 makina të armatosura dhe 29 helikopterë,” thekson ky zyrtar ukrainas ndërkohë që RFE raporton se nuk i ka konfirmuar këto të dhëna, Mbretëria e Bashkuar tha se beson që forcat ruse janë duke u përballur me humbje të mëdha gjatë pushtimit.
Ndërsa zyrtarët në Moskë, pas disa ditëve që kanë pretenduar se asnjë ushtar rus nuk ka vdekur, dielën u detyruan të pranojnë se disa ushtarë kanë vdekur.
Ndryshe, sulmi i Rusisë ndaj Ukrainës nisi më 24 shkurt dhe u pësua me një varg sanksionesh që vendet e Perëndimit i vunë Rusisë. Më 28 shkurt, raporton RFE, negociatorët nga Kievi dhe Moska kanë zhvilluar bisedime në Bjellorusi me qëllim të dhënies fund të konfliktit. Rusia ka thënë se të dyja palët janë pajtuar për të zhvilluar diskutime dhe do të takohen sërish “në ditët në vijim”
