Putin ofron nënshtetësi për ukrainasit në zonat e pushtuara, ushtarët e tij i trajton si plehëra
Presidenti i Rusisë, Vladimir Putin ka firmosur Dekretin përmes të cilit i mundëson banorëve të zonave të okupuara në Ukrainë, që të bëhen shtetas rus, ka bërë të ditur Agjencia ruse e lajmeve RIA.
Dekreti i ri, raporton Sky News, është kopje e asaj të vitit 2019 e cila i mundësonte banorëve të zonave ukrainase nën kontrollin e separatistëve prorus në Donjeck dhe Luhansk, që më lehtë të marrin dokumentat ruse të udhëtimit.
Dhe ndërkohë që Rusia vazhdon dhe mburret me moton “Nuk i braktisim tanët” dhe Presidenti i Rusisë, Vladimir Putin, e arsyeton sulmin në Ukrainë duke theksuar se njerëzve që flasin rusisht u duhet mbrojtja , siç duket kjo nuk vlenë për ushtarët rusë. BBC raporton se rusët po i lënë nëpër rrugë, trupat e pajetë të ushtarëve të tyre, si plehëra.
Me javë të tëra pasi nuk arritën ta marrin kryeqytetin e Ukrainës, mbetjet mortore të ushtarëve rus vazhdojnë të gjenden përreth fshatrave që kanë kaluar afër Kievit. Mirëpo, Ukraina thotë se Rusia tregon pak interes që ti marrë, raporton BBC.
Nga varret në male, trupat e pajetë janë transferuar në një tren-frigorifer në perifer të Kievit, i cili tani është si një morg lëvizës për ushtarët e vrarë rusë. Qeset e bardha plastike janë shënuar me numra dhe jo emra, e në ditën kur reporterët e BBC e vizituan ishin të paktën 137 trupa në dy trena.
“Trupat e pajetë që kemi gjetur tregojnë se njerëzit i trajtojnë si plehëra, si mish për top. Atyre nuk u duhen ushtarët e tyre. I gjuajnë këtu në luftë, pastaj tërhiqen dhe lënë trupat e pajetë,” tha për BBC koloneli ukrainas, Volodymyr Liamzin.
Vendasit vazhdojnë duke gjetur trupa të pajetë të ushtarëve rus nëpër mal, që kryesisht janë të rinjë dhe të papërvojë që u dërguan për të sulmuar Kievin, dhe përfunduan duke ikur nga zjarri.
“Kemi kryer një shkëmbim. Jemi të gatshëm ti kthejmë që të gjithë sepse i duam të vdekurit tanë. Po trokasim në të gjitha dyert, por nuk ka përgjigje, nuk ka dialog,” thotë koloneli Liamzin duke sqaruar se pala ruse e ka dorëzuar listën e ushtarëve të vrarë që kishte dëshirë ti kthente.
Treni-frigorifer në Kiev vazhdon të mbushet ndërsa trena të tillë ka dhe në qytetet tjera afër frontit. Për ushtrinë ukrainase që i mbledhë dhe ruan trupat e pajetë, këto pamje shkaktojnë pak dhembshuri. Trupat e pajetë u takojnë ushtarëve të palës armike, pushtuesve.
Por në Rusi, dikush, diku, me siguri se kërkon secilin prej tyre.
