Putini erdhi në Beograd, tha ato që ishin raportuar në media dhe iku…

Vizita e presidentit të Rusisë, Vladimir Putin, kur i shtohet edhe faktin se është njëri ndër liderët më të fuqishëm në botë, vizitën e tij në Beograd e bënë më të çuditshmen në analet e vizitave të liderëve botëror.

Duke pasur parasysh përgatitjet që bëhen aty ku shkel Putin, kontrollin e ujit, ajrit dhe tokës, asgjë nuk e arsyeton faktin se ai vjen në Beograd për të thënë atë që ekzaktësisht raportuar mediat serbe se do të thotë pas takimit me Vuçiçin.

 “Sa i përket Kosovës, qëndrimi rus dihet. Ne duam që të arrini marrëveshje të pranueshme për ju me Kosovën, bazuar në Rezolutën 1244 të KS të OKB-së.

Fatkeqësisht, kohëve të fundit, autoritetet në Kosovë kanë ndërmarrë veprime provokuese gjë që tensionoi situatën në rajon. Për këtë e kam fjalën, për formimin e Ushtrisë së Kosovës, e që është shkelje e rezolutës në fjalë e cila nuk e lejon këtë. Rusia e ndan shqetësimin me Serbinë për këto veprime të papërgjegjshme sepse këto veprime mund të sjellin destabilizim,” tha Vladimir Putin pas takimit me presidentin e Serbisë, Aleksandar Vuçiç pasi ky e kishte “informuar”, përveç se e kishte falënderuar për përkrahje në ruajtjen e integritetit të Serbisë.

“E kam informuar presidentin Putin për gjithçka çka po ndodh me Kosovën, përfshirë taksën e padrejtë ndaj produkteve serbe. E kam informuar edhe për formimin e Ushtrisë së Kosovës në kundërshtim me rezolutën 1244. Ai po na përkrah në këtë. Unë i kam thënë se Serbia ishte e gatshme për dialog e kompromise, por nuk do të pranojmë përulje,” tha Vuçiç.

Edhe në konferencën e përbashkët të, Aleksandar Vuçiç tha ato që thotë çdo ditë në foltoren e presidencës serbe, se shqiptarët nuk duan kompromis dhe se nuk gjasa që në një të ardhme të afërt të arrihet marrëveshje me Kosovën, për të shtuar atë që për dy javë raportojnë mediat serbe që tashmë janë nën kontrollin  e presidentit të Serbisë, se do të konsultohet me Putinin para çdo veprimi tjetër.

Dhe, Putin nga ana e tij, tha ekzaktësisht atë që ishte publikuar në një intervistë të kontrolluar nga shteti rus që u botua në të përditshmen serbe “Veçernje Novosti”, se Rusia gjithmonë ka pasur rol në zgjidhjen e çështjes mes Serbisë e Kosovës, por pak çka ka lëvizur deri tash mes këtyre dy palëve ndërsa përmendi mosformimin e Asociacionit të komunave me shumicë serbe; por asgjë nuk lëvizi nga skenari.

Presidenti i Rusisë, Vladimir Putin, erdhi në Beograd, bëri një shtetitje me itinerar të caktuar , takoi presidentin dhe qeverinë e Serbisë, dhe e vetmja gjë që nuk raportuan mediat serbe dhe ndodhi ishte se para Katedrales Shën Sava priten të mbledhen për ta pritur Putin 70 mijë serbë dhe u mblodhën 100 mijë serbë.   

Në fund, Putin erdhi në Beograd e shkoi dhe ndodhi pikërisht ashtu siç e parashikoi gazetari serb i “Veçernje Novosti” që e kishte intervistuar, Branko Vllahoviç, para se ai të shkelte në tokën serbe.

Duke folur për TV Prva ndërsa pritej ardhja e avionit presidencial serb, Vllahoviç tha se po raportohen çmenduri të ndryshme në mediat serbe sikur numri i gazetarëve të akredituar dëshmon interesin rus ndërkohë që ai është një numër standard.

Për Kosovën, ai ishte edhe më i prerë: “Mediat serbe po raportojnë marrëzira sikur ai do të vijë me raketa dhe do ta sjellë ushtrinë në Kosovë. Kjo nuk ka lidhje, Putin dhe Rusia nuk e kanë ndërmend të luftojnë në Kosovë dhe nuk do të marrin pjesë në kurrfarë operacione ushtarake. Ne për këtë duhet të jemi të ndërgjegjshëm. Ajo që ne mund të presim nga rusët, është mbështetja në organizatat ndërkombëtare ku rusët kanë të drejtën e vetos dhe ndihmën humanitare të Rusisë rreth Kosovës, dhe asgjë tjetër,” tha gazetari serb duke deklaruar një marrëveshje e cila u heshtë para dhe pas takimit ndonëse u firmos sot nga dy shtetet:

“Shumica e atyre që do të firmosen sot janë protokolle për qëllime të mira prej të cilave nuk ka kurrfarë dobie. P.sh. Rogozin dhe Nenad Popoviç do të firmosin kornizat e marrëveshjes për bashkëpunim në kozmos. Kjo është një temë e gjeneratave pas 30 viteve, ëshët qesharake. E çfarë na duhet neve dhe politikanët tanë nuk kërkojnë? Për fat të keq, politikanët tanë nuk kërkojnë hapjen e vendeve të reja të punës në Rusi. Dhe ajo për çfarë nuk flitet është se aktualisht në Rusi po punojnë gjithnjë e më pak shtetas serbë në dhe sot janë më pak se 10 mijë punëtorë,” tha Vllahoviç për Tv Prva , duke treguar atë që do realisht do të ndodhte pak orë më pas. Ndërkohë, rritja e kapacitetit të deponisë së gazit “Kalaja e Banatit”, ishte dhe ngeli arsyeja e vetme që do ti shërben gazjsellësit rus drejtë shteteve të Perëndimit,  që mund të ishte dhe është interesimi i Presidentit të Rusisë, Vladimir Putin dhe Gasprom-it.