PZAP konfirmon vendimin e KQZ, Albin Kurtit i mohohet kandidimi në zgjedhje

Paneli Zgjedhor i Ankesave dhe Parashtresave, PZAP, ka refuzuar pjesërisht ankesën e Lëvizjes Vetëvendosje të paraqitur në këtë panel, pas moscertifikimit të listës së kandidatëve për deputetë nga e Komisionit Qendror të Zgjedhjeve, KQZ.

Sipas vendimit të PZAP, Albin Kurti, Albulena Haxhiu, Liburn Aliu, Bajram Mavriqi dhe Labinotë Demi-Murtezi, nuk mund të certifikohen për zgjedhjet e parakohshme parlamentare që do të mbahen më 14 shkurt.

“Pranohet pjesërisht rekomandimi i ZRPPC-së, certifikohet lista e kandidatëve për deputetë të kësaj partie, me përjashtim të kandidatëve të cekur”, thuhet në njoftim ku shtohet se “kandidatët e cekur në pikën një të diapozitivit të këtij vendimi, nuk mund të zëvendësohen me kandidatë të tjerë”.

Gjithashtu Paneli ka vendosur që Nisma Socialdemokrate të certifikohet si parti politike për zgjedhjet e 14 shkurtit, por ka refuzuar kërkesën për certifikimin e 12 kandidatëve për deputetë: Vesel Krasniqi, Besnik Berisha, FIlloreta Bytyçi, Valentina Alijaja, Xhafer Berisha, Aziz Thaçi, Musa Fetahaj, Hasime Daka, Fatmir Gërdellaj, Vehbi Avdullahaj, Endrit Shala dhe Adrian Nokaj. Edhe kandidatët e Nismës që janë cekur në vendim, nuk mund të zëvendësohen me kandidatë të tjerë thotë PZAP-ja.

Vendimi i njëjtë vlen edhe për Aleancën për Ardhmërinë e Kosovës, ku PZAP-ja vendosi që kandidatët për deputetë: Shemsedin Dreshaj, Gani Dreshaj, Rrahim Ajeti dhe Shqipe Kastrati nuk mund të certifikohen dhe as të zëvendësohen me kandidatë të tjerë.

Ndryshe, ppalët që nuk janë të kënaqura me vendimet e PZAP, brenda 24 orëve mund t’i drejtohen Gjykatës Supreme e cila ka afat 72 orë që t’i përgjigjet ankesave të paraqitura.