Qafë Thanë, fluks hyrje-daljesh pas festave, ja shifrat e fundit

Pas festave të fundvitit, në Pikën Kufitare të Qafë Thanës është rritur fluksi si në hyrje ashtu dhe dalje. Sipas informacioneve zyrtare nga Drejtoria e Kufirit dhe Migracionit gjatë 24 orëve të fundit nga kjo Pikë Kuiftare kanë hyrë dhe dalë mbi 4000 shtetas shqiptarë dhe të huaj.

Fluksi më i lartë është shënuar në dalje nga vendi ynë drejt Maqedonisë së Veriut, nga ku numërohen 2090 shtetas.

Mësohet se shtetasit shqiptarë zgjedhin pikën e kalimit kufitar të Qafë Thanës për të hyrë drejt Greqisë, pasi pika e kalimit kufitar të Kapshtices vijon te jetë e bllokuar për daljet.

Ndërkohë mësohet se autoritetet shqiptare po punojnë me 3 sportele në dalje dhe 2 të tjera në hyrje.

Gjatë 24 orëve të fundit në Kapshticë, kanë hyrë 86 shtetas dhe 31 mjete ndërsa në Qafë-Thanë, kanë hyrë 1922 shtetas dhe kanë dalë 2090 shtetas.