Qafë Thanë, Yuri Kim: Ndihma e SHBA po e bën Ballkanin Perëndimor më të sigurtë!

Ndihma e Shteteve të Bashkuara po e bën Ballkanin Perëndimor më të sigurt, më demokratik dhe më miqësor ndaj biznesit, tha Ambasadorja e SHBA në Tiranë, Yuri Kim, nga pika kufitare e Qafë Thanës ku autoriteteve doganore iu dhuruan pajisje nga USAID.

“Jam këtu për të theksuar se si ndihma e SHBA po e bën Ballkanin Perëndimor më të sigurt, më demokratik dhe më miqësor ndaj biznesit. Jo shumë kohë më parë kufijtë kanë qenë si mure, sidomos në këtë rajon, nën pretekstin e sigurisë kombëtare duke ndarë njerëzit, duke penguar tregtinë, besimin e ndërsjelltë. Ndërsa sot qëndrojmë në një kufi që është jo vetëm më i sigurtë, por synon të sjellë njerëzit më pranë dhe të cojë përpara integrimin paqen dhe begatinë. Sot Shqipëria dhe Maqedonia e Veriut janë në prag të anëtarësimit në BE, dhe ShBA e mbështet këtë qëllim,” tha Ambasadorja amerikane Yuri Kim duke përfunduar:

“Pajisjet e blera nga USAID do të sigurojnë që autoritetet doganore të arrijnë standarde më të larta në procedurat kufitare, lehtësimin e mjedisit për biznesin dhe kontrolleve për sigurinë.”