Qarkullonte me armë, arrestohet në flagrancë 21 vjeçari

Një 21 vjeçar u arrestua nga policia në kushtet e flagrancës pasi qarkullonte me armë zjarri. Sipas një njoftimi nga policia, efektivët në Dhërmi, kishin marrë informacion se një i ri po lëvizte me armë zjarri me vete, si pasagjer në një automjet BMV X5.

Policia menjëherë ka organizuar punën, ku rreth orës 23.00, në fshatin Dhërmi, bashkia Himarë, në lagjen “Gjilek”, është konstatuar mjeti që dyshohej se lëvizte personi që kishte armë me vete.

Gjatë kontrollit fizik të bërë shtetasit R. V, 21 vjeç, banues në Vlorë, policia i gjeti dhe sekuestroi në cilësinë materiale një armë zjarri e markës TT me një kreher me 7 fishekë.

Në automjet udhëtonin edhe 3 persona të tjerë, të cilët së bashku me automjetin janë shoqëruar në ambientet e Komisariatit të Policisë Himarë për veprime të mëtejshme hetimore.

Në përfundim të veprimeve të para hetimore të kryera nga Specialistët për Hetimin e Krimit në Komisariatin e Policisë Himarë, u bë arrestimi në flagrancë i shtetasit R.V, për veprën penale “Prodhimi dhe mbajtja pa leje e armëve luftarake dhe municionit”, ndërsa personat e tjerë janë lënë të lirë.

Materialet i kaluan Prokurorisë për veprime të mëtejshme.