Qëllohen Zyrat e PD Kavajë, plagoset Sekretari, Basha: Kërkojnë të na mbyllin gojën!
Të shtëna me armë zjarri janë regjistruar mbrëmjen e sotme në drejtim të Zyrës elektorale të Partisë Demokratike në Kavajë, ku ka mbetur i plagosur Sekretari Bledar Okshtuni.
Pas këtij akti të shëmtuar, Kryetari i Partisë Demokratike, Lulzim Basha, ka mbërritur në Zyrat e PD-së në Kavajë, ku tha se ky akt është një atentat ndaj demokracisë, ndërsa i ftoi qytetarët që në 25 prill t’i dënojnë masivisht me votë.
“Kërkojnë të na mbyllin gojën, Nuk na e kanë mbyllur kurrë, nuk i kemi frikë, do marrin përgjigjen e merituar me votë të dielën nga Kavaja. Kavaja i di fare mirë të tilla akte kanë shënuar kthesa të mëdha, rrëzimin e diktatorëve dhe diktaturave. Ato tregojnë humbjen e toruas nga një njeri dhe një grusht njerëzish që e dinë se shqiptarë janë të vendosur për t’i larguar.
Le t’ia japim përgjigjen këtij akti burracak dhe atentati të demokracisë masivisht ditën e dielë dhe t’i japim fund këtij tetëvjeçari makth për shumicën dërrmuese të shqiptarëve.”
Pas këtij sulmi me armë zjarri, policia dha njoftimin më të çuditshëm që do të mbetet në analet e krimit. Një kriminel nga Interpol Roma, qëllon për pas një konflikti për motive të dobëta ku ka mbetur i plagosur një 27 vjeçar në Zyrat e një partie politike.
U identifikua si Ndriçim Jonuzi i cili endej në Kavajë i armatosur ndërsa sonte në shoqërinë e dy personave, të identifikuar si Markel Shtylla dhe Dorian Troplini, Jonuzi u fut në zyrat e Partisë Demokratike dhe plagosi Sekretarin Bledar Okshtuni. Ky i fundit mbeti i plagosur në këmbë, dhe fatmirësisht është jashtë rrezikut për jetën.
Ndërsa krimineli është po ai që ishte arrestuar 7 vjet më parë dhe pse përfundoi në Zyrat e PD përgjigja pritet nëse arrestohet dikur.
Njoftimi i Policisë:
Plagosi me armë zjarri 27 vjeçarin, identifikohet dhe shpallet në kërkim autori i dyshuar.
Vijon krehja e zonës për kapjen e tij.
Sot rreth orës 19:00, në lagjen nr.4, në Kavajë, shtetasi N. J., dyshohet se si pasojë e një konflikti për motive të dobëta, ka hyrë në ambientet e brendshme të një zyre elektorale të një subjekti politik dhe ka plagosur me armë zjarri pistoletë në këmbë shtetasin B. O., 27 vjeç, i cili ndodhet në spitalin e Durrësit, nën kujdesin e mjekëve.
Menjëherë forca të shumta Policie kanë shkuar në vendngjarje dhe vijon krehja e zonës si edhe janë ngritur pika kontrolli në hyrje -dalje të Qytetit për kapjen e autorit.
Grupi hetimor nën drejtimin e Prokurorisë vijon punën për zbardhjen e plotë të rrethanave të ngjarjes.
